पोखरा । समुदायमा आधारित पुनस्र्थापना सेवा (सिबिआरयस), नेपालको अध्यक्षमा पुरन कुँवर निर्वाचित भएका छन् ।

संस्थाको ३१ औं वार्षिक साभारण सभा, सामाजिक परीक्षण तथा १४ औं अधिवेशनले कुँवरको नेतृत्वमा आगामी २ वर्षका लागि सर्वसम्मत् ९ सदस्यीय कार्यसमिति चयन गरेको हो । समिति उपाध्यक्षमा दिलीपकुमार शर्मा, महासचिव डा. चण्डिका पण्डित, सचिव मोहनमुरारी खनाल, कोषाध्यक्ष आशाकुमारी गौतम चयन भए । सदस्यमा झलकबहादुर राना, सरला दास, गोमा प्रधान र प्रदीपभक्त आचार्य छन् ।

प्रमुख अतिथि रोटरी क्लब इलेक्ट गभर्नर तथा सल्लाहकार विनोद कोइरालाले संस्थाले लामो समयदेखि निरन्तररुपमा अपाङ्गताको क्षेत्रमा गरेको कार्यको प्रशंसा गरे । उनले कास्की, स्याङ्जा, र तनहुँ जिल्लाका विभिन्न ९ वडा पालिकाका ५७ वटा वडामा तथा नेपालका अन्य विभिन्न ठाउँ पुगेर करिब ३ हजार २ सय ८ जना अपाङ्गता भएका व्यक्ति र परिवारलाई सेवा गरेको सुन्न पाउँदा अत्यन्त खुसी लागेको बताए । उनले सिबिआरयसका यस्ता पवित्र र मानव सेवामूलक कार्यत्रमा आफ्नो सधैँ सहयोग र सद्भाव रहने प्रतिबद्धता जनाए ।

कार्यक्रम संस्थाका कार्यवाहक अध्यक्ष मोहनमुरारी खनालको अध्यक्षतामा भएको कार्यक्रममा कार्यसमिति सदस्य झलकबहादुर रानाले सञ्चालन गरेका थिए ।

महासचिव पुरन कुँवरले आव २०८०/०८१ को वार्षिक प्रगति प्रतिवेदन, कोषाध्यक्ष्य आशाकुमारी गौतमले पेस गरेको आर्थिक आय र व्यय विवरण तथा आव २०८१/०८२ को अनुमानित बजेट तथा कार्यक्रम र कावा अध्यक्ष मोहनमुरारी खनालले पेस गरेको आव २०८१/०८२ को नीति तथा कार्यक्रम सर्वसम्मत पारित भयो । सेवाग्रहीको तर्फबाट शुक्लागण्डकी ३ का गोकर्ण कँवरले शुभकामना मन्तव्य दिए । गैसस महासंघ कास्की अध्यक्ष डा. बुद्धिबहादुर थापाले संस्थाले पीडित र सेवाबाट वञ्चितलाई सुशासन कायम राखेर निरन्तररुपामा ३१ वर्षसम्म मानवीय सेवा गरिरहेकामा खुसी व्यक्त गरे ।

निर्वाचन संयोजक अधिवक्ता भगवती पहारीले नयाँ कार्यसमितिको कार्यकाल उपलब्धिमूलक र उदाहरणीय रहोस् भन्ने शुभकामना दिइन् । कार्यक्रममा सम्बन्धित सेवाग्राही तथा सरोकारवालाबीच सामाजिक परीक्षणसमेत गरिएको थियो । सो अवसरमा कुशल परियारलाई गुड्ने कुर्ची, राहुल श्रेष्ठलाई ट्वाइलेट कुर्ची, जिना रानालाई किराना तथा चटपट पसल सञ्चालनार्थ ८ हजार र स्मृति नेपालीलाई बाख्रापालनका लागि ८ हजार सहयोग गरिएको छ ।

साथै, कर्मचारी शकुन्तला कोइरालालाई २५ वर्षे दीर्घसेवा सम्मान र भगवान् बराल तथा पूनमदेवी ढुंगानाको शुभविवाहको उपलक्ष्यमा सम्मान गरियो ।