लेखनाथ । आदर्श समाज राष्ट्रिय दैनिकका प्रधानसम्पादक कृष्णप्रसाद बास्तोलालाई ‘आर्थिक पत्रकारिता पुरस्कार–२०८१’ बाट सम्मान गरिने भएको छ ।

लेखनाथ उद्योग वाणिज्य संघका पूर्व कार्यसमिति सदस्य सूर्यमणि लामिछानेबाट आफ्ना मातापिता शालिकराम र पार्वतीदेवी लामिछानेको स्मृतिमा स्थापित उक्त पुरस्कार पहिलोपल्ट प्रधानसम्पादक बास्तोलालाई प्रदान गर्न लागिएको हो ।

लेखनाथ उद्योग वाणिज्य संघद्वारा सञ्चालित उक्त पुरस्कारका लागि प्रतिभा छनोट समितिमा संघ अध्यक्ष विनोद श्रेष्ठ, संघ पूर्व अध्यक्ष बाबुराम गिरी, वरिष्ठ उपाध्यक्ष राजेन्द्र ओझा, पुरस्कारका संस्थापक सूर्यमणि लामिछाने र लेखनाथ पत्रकार मञ्च अध्यक्ष कविराज खनाल सदस्य थिए ।

शनिबार हुने संघको २८ औं वार्षिक साधारण सभा उद्घाटन समारोहमा उक्त पुरस्कार अर्पण गरिनेछ । पुरस्कार राशि १५ हजार ८८ रुपैयाँ, दोसल्ला र प्रमाणपत्र छ ।

४ दशकभन्दा बढी समयदेखि निरन्तर पत्रकारितामा क्रियाशील बास्तोला स्वतन्त्र पत्रकार संघ नेपालका संस्थापक अध्यक्ष एवं नेपाल पत्रकार महासंघ कास्कीका पूर्व अध्यक्ष हुन् ।

‘समुन्नतिका लागि स्वतन्त्र पत्रकारिता’ भन्ने मूलमन्त्रका साथ २०५३ सालदेखि निरन्तर प्रकाशित आदर्श समाजले गण्डकी प्रदेशको आर्थिक गतिविधि अलावा पर्यटन, उद्योग, कृषि, शिक्षा, स्वास्थ्य तथा समसामयिक विषयलाई प्राथमिकताका साथ समेट्दै आएको छ । पत्रकारितालाई मूल पेसा बनाएका बास्तोलाका विभिन्न साहित्यिक कृतिसमेत प्रकाशित छन् । उनी यसअघि झण्डै ४० संघसंस्थाबाट पुरस्कृत एवं सम्मानित भएका छन् भने करिब २ दर्जन संस्थामा आबद्ध छन् ।