लेखनाथ । गण्डकी प्रदेशभित्रका २४ वटा उद्योग वाणिज्य संघका अध्यक्षसहित प्रतिनिधिको प्रदेशस्तरीय गोष्ठी लेखनाथमा बस्ने भएको छ । लेखनाथ उद्योग वाणिज्य संघ आयोेजनामा ११ असोजमा उक्त गोष्ठी हुन लागेको हो ।

गोष्ठीमा समग्र गण्डकीको पर्यटकीय सम्भावना तथा विकासका सम्बन्धमा कार्यपत्र प्रस्तुत गरी कार्ययोजनाबारे घोषणापत्र नै तयार गर्ने उद्देश्य राखिएको संघका अध्यक्ष विनोद श्रेष्ठले बताए ।

गोष्ठीमा नेपाल उद्योग वाणिज्य महासंघका पदाधिकारी, गण्डकीभित्र रहेका २४ उद्योग वाणिज्य संघका अध्यक्ष, उपाध्यक्ष र महासचिव, पर्यटनसँग सम्बन्धित विभिन्न संघ संस्थाका प्रमुख एवं प्रतिनिधि, पर्यटन विज्ञको सहभागिता रहने छ ।

गोष्ठीको उद्घाटन गण्डकीका मुख्यमन्त्री सुरेन्द्रराज पाण्डेले गर्ने कार्यक्रम तय गरिएको भेला आयोजक समिति संयोजक तथा लेखनाथ उद्योग वाणिज्य संघका वरिष्ठ उपाध्यक्ष राजेन्द्र ओेझाले बताए ।

पर्यटकीय सम्भावना तथा विकाससम्बन्धी गोष्ठीमा पर्यटन विज्ञ श्रीकान्त शर्मा खतिवडाले कार्यपत्र प्रस्तुत गर्ने छन् । उक्त कार्यक्रमका लागि सबै संघसंस्था तथा पर्यटन विज्ञहरुलाई निमन्त्रणा तथा गोष्ठीको पूर्व तयारी सम्पन्न भइरहेको संघका महासचिव जानुका पराजुली अधिकारीले बताइन् ।