पोखरा । पोखरा विश्वविद्यालय स्कुल अफ बिजनसले यस वर्ष देशभरमै उत्कृष्ट क्याम्पस राष्ट्रिय पुरस्कार प्राप्त गरेको छ ।

राष्ट्रिय शिक्षा दिवसका अवसरमा काठमाडौंमा बुधबार आयोजित समारोहमा प्रधानमन्त्री केपी शर्मा ओलीले २ लाख ५० हजार राशिको उक्त पुरस्कार स्कुल अफ बिजेनसका निर्देशक डा. श्रृजन ज्ञवालीलाई हस्तान्तरण गरे । सो अवसरमा शिक्षा, विज्ञान तथा प्रविधि मन्त्री विद्या भट्टराई, पोखरा विश्वविद्यालयका उपकुलपति प्राडा प्रेमनारायण अर्याल लगायत उपस्थित थिए ।

सो अवसरमा प्रधानमन्त्री ओलीले उत्कृष्ट हुने क्याम्पस तथा विद्यालयलाई ‘राष्ट्रिय शिक्षा पुरस्कार’बाट पुरस्कृत गरे ।

यस्तै, सामुदायिक क्याम्पसतर्फ ललितपुरको चापागाउँस्थित जनभावना क्याम्पस र निजी क्याम्पसमध्येबाट काठमाडौंको मनमोहन मेमोरियल इन्स्टिच्युट अफ हेल्थ साइन्सेज पुरस्कृत भएका छन् । दुवैले जनही २ लाख ५० हजारसहित प्रमाणपत्र प्राप्त गरेका छन् ।

सार्वजनिक विद्यालयतर्फ २०८० सालको माध्यमिक शिक्षा परीक्षामा प्राप्त गरेको नतिजाका आधारमा दाङको तुलसीपुरस्थित तुलसीपुर माविले प्रथम स्थान हासिल गर्दै राष्ट्रिय शिक्षा पुरस्कार पाएको छ । उक्त विद्यालयले नगद ३ लाखसहित शिल्ड, ध्वजा र प्रमाणपत्र प्राप्त गरेको छ ।

काठमाडौंको विश्वनिकेतन माविले द्वितीय स्थान हासिल गर्दै २ लाख, तृतीय हुने दाङको शान्तिनगरस्थित जनकल्याण माविले १ लाखसहित शिल्ड, ध्वजा र प्रमाणपत्र पाए ।

यस्तै, निजीतर्फ २०८० सालको माध्यमिक शिक्षा परीक्षामा प्रथम हुने काठमाडौं टोखा–८ स्थित फलोसेन्ट माविले ३ लाखसहित शिल्ड, ध्वजा र प्रमाणपत्र पाएको छ । द्वितीय हुने बिजेश्वरी ज्ञान मन्दिर सैनिक महाविद्यालय काठमाडांैले २ लाखसहित शिल्ड, ध्वजा र प्रमाणपत्र तथा तृतीय हुने काठमाडौंकै बूढानीलकण्ठले १ लाखसहित शिल्ड, ध्वजा र प्रमाणपत्र प्राप्त गरेको छ ।

प्राविधिक शिक्षालयतर्फ सर्वोत्कृष्ट नतिजा ल्याउने नेपाल बनेपा बहुप्राविधिक बनेपा, काभ्रेपलाञ्चोक, तुलसीपुर पोलिटेक्निक इन्स्टिच्युट तुलसीपुर, दाङ, जनता मावि वाणगंगा, कपिलवस्तु र नेपाल आर्मी कलेज अफ हेल्थ साइन्स, काठमाडौंलाई १ लाखसहित राष्ट्रिय शिक्षा पुरस्कार प्रदान गरिएको छ । ती शिक्षालयलाई प्राविधिक शिक्षा तथा व्यावसायिक तालिम परिषद्बाट सञ्चालन गरेको परीक्षामा सर्वोकृष्ट नतिजा ल्याएका आधारमा पुरस्कृत गरिएको हो ।

समाज कल्याण शिक्षा पुरस्कार युवा क्रियाकलाप उत्थान केन्द्र कागेश्वरी मनहरा र सी आशा फाउन्डेसन ललितपुरलाई प्रदान गरिएको छ । ती दुवैलाई जनही २ लाखसहित प्रमाणपत्र प्रदान गरियो ।