पोखरा । सहारा क्लब पोखराद्वारा सञ्चालित सहारा फुटबल एकेडेमी संचालनार्थ स्थापित अक्षयकोषमा अमेरिका बस्ने नेपालीले सहयोग गरेका छन् ।

क्लबको आइतबार २६ औं वार्षिकोत्सव एवं साधारणसभामा अग्रज पत्रकार एवं क्लबका मानार्थ सदस्य नारायण कार्कीले २ लाख १७ हजार ९ सय रुपैयाँ क्लब अध्यक्ष केशवराज बराललाई हस्तान्तरण गरे ।

अमेरिकाको क्यान्सस राज्यको ओभरल्याण्ड पार्कमा बसोबास गर्ने नेपाली समुदायका २३ जनाले उक्त रकम संकलन गरेको जानकारी कार्कीले दिए । हालै अमेरिका भ्रमणबाट फर्केका अग्रज पत्रकार कार्कीका अनुसार पोखरा लगायत नेपालका विभिन्न भागबाट ओभरल्याण्ड पार्कमा रहेका नेपालीले २० देखि २५० डलरसम्म सहयोग गरेका हुन् । अक्षयकोषको ब्याजबाट एकेडेमी सञ्चालन गर्ने उद्देश्यले सुरु गरिएको अक्षयकोषमा हालसम्म ३ करोड १७ लाख संकलन भइसकेको क्लब महासचिव रामजीप्रसाद अधिकारीले जानकारी दिए ।

एकेडेमीमा हाल विपन्न र कठिन परिस्थितिका ३० जना बालकाहरुको आवास, स्वास्थ्य, शिक्षाको व्यवस्था हुँदै आएको छ ।

पोखरा १७, दोबिल्लास्थित सहारा फुटबल एकेडेमीमा वार्षिकोत्सव समारोह गण्डकी प्रदेशका सामाजिक विकास, युवा तथा खेलकुद मन्त्री बिन्दुकुमार थापाको प्रमुख आतिथ्यमा भएको हो । सो अवसरमा यस वर्षको सहारा खेलकुद पत्रकारिता पुरस्कारबाट परशुराम शर्मा सम्मानित भए । साथै, सहारा उत्कृष्ट सदस्य सम्मान लीलबहादुर थापा सम्मानित भए ।

कार्यक्रम सहारा क्लब पोखरा अध्यक्ष केशवराज बरालको अध्यक्षतामा भएको हो ।