पोखरा । ‘बालबालिकामा लगानीः सुनिश्चित भविष्यको थालनी’ नाराका साथ माछापुच्छ्रे गाउँपालिकामा ६०औं राष्ट्रिय बाल दिवस ‘बाल संवाद’ कार्यक्रम गरी मनाइएको छ ।

कार्यक्रममा गाउँपालिका अन्तर्गत सामुदायिक विद्यालयका विद्यार्थीको प्रतिनिधिमूलक सहभागिता रह्यो । सहभागी विद्यार्थीले आधारभूत आवश्यकताहरु माया, ममता, संरक्षण, स्वास्थ वातावरण, उचित पोषण, शिक्षा, शिक्षक, अध्ययनरत् विद्यालयको भौतिक अवस्था तथा कठिनाइ साथै विकासका अवसरमा पाउनुपर्ने बाल अधिकारका विषयमा भोग्नुपरेका समस्याको उठान गर्दै समाधानका लागि पालिका नेतृत्वको ध्यानाकर्षण गराए ।

गाउँपालिका उपाध्यक्ष सीता अधिकारीले संवादका क्रममा उठेका समस्यालाई प्राथमिकताका आधारमा पालिकाले सहजीकरण गर्ने प्रतिबद्धता जनाइन्।बालबालिकाका निम्ति गरिने प्रत्येक क्रियाकलाप बाल अधिकारका आधारभूत सिद्धान्त विपरीत हुन नहुनेमा जोड दिइन् ।

उनले विद्यालयमा भए गरेका कार्यहरु बालअधिकारको पक्षमा छन् कि छैनन् भन्ने नजिकबाट बुझ्न आफूलाई सहज भएको सुनाउँदै आगामि दिनमा यस्ता कार्यक्रमलाई पालिकाले प्राथमिकतामा राखी निरन्तरता दिने प्रतिबद्धता पनि जनाइन् ।

कार्यक्रमा गाउँपालिकाका प्रमुख प्रशासकीय अधिकृत गोपीकृष्ण अर्याल, शिक्षा शाखा सहायक विष्णुप्रसाद अधिकारी, वडा ८ अध्यक्ष रामबहादुर गुरुङ लगायतले शुुभकामना मन्तव्य राखे । कार्यक्रममा वडा ९ अध्यक्ष हरिबहादुर क्षत्री, वडा ४ अध्यक्ष मधुसुदन अधिकारी, बालअधिकार समिति सदस्य गोविन्द अधिकारी, सुमिता भण्डारी लगायतको विशेष उपस्थिति रह्यो ।

कार्यक्रमबीच २०८० को एसइईमा उत्कृष्ट नतिजा प्राप्त गर्न सफल निष्पक्ष माविका पर्वत दाहाल र माछापुच्छ्रे माविका सौगात रेग्मीलाई सम्मान गरियो ।

शिक्षक–शिक्षिकाबीच कुर्ची घुमाइ प्रतियोगितामा शिक्षकतर्फ माछापुच्छे« माविका मिलन मजाकोटी प्रथम, भुमेश्वर आधारभूतका नवराज गौतम द्वितीय, शारदा माविका दीपेन्द्र लम्साल तृतीय भए ।

शिक्षिकातर्फ जनजागरण आधारभूतकी डिलमाया ढकाल प्रथम, अन्नपूर्ण आधारभूतकी बुद्धिकुमारी गुरुङ द्वितिय र जनकल्याण आधारभूतकी रुपा अधिकारी तृतीय भए ।

गाउँपालिका बालसञ्जाल अध्यक्ष आशिक परियारको अध्यक्षतामा भएको कार्यक्रममा प्रमुख प्रशासकीय अधिकृत अर्यालले स्वागत एवं महिला तथा बालबालिका शाखा प्रमुख ज्योति पौडेलले कार्यक्रम संचालन गरिन् ।