पोखरा । गण्डकी पेट्रोलियम कम्पनी प्रालिले स्थापनाको ऐतिहासिक स्वर्ण महोत्सव मनाएको छ ।

पोखरामा शनिबार आयोजित समारोहमा विभिन्न व्यक्तिलाई सम्मान, स्मारिका विमोचनसहित शुभकामना आदानप्रदान गरी स्वर्ण महोत्सव मनाइएको हो ।
कार्यक्रममा भारतीय पेन्सन वितरण कार्यालय, रामबजारका प्रमुख ले.कर्नल पि.एस. बघेलले भूपू सैनिकहरुको सक्रियतामा आजभन्दा ५० वर्षअघि स्थापित गण्डकी पेट्रोलियमको स्वर्ण महोत्सव अवसरमा शुभकामना दिँदै अझ प्रगतिको कामना गरे । उनले कोरोनाको विषम परिस्थितिमा पनि संस्थाले पेट्रोलियम पदार्थ उपलब्ध गराएर गरेको सहयोगको स्मरण गर्दै आगामी दिनमा पनि दुवैको तर्फबाट यस्तैखालको सहकार्य रहीरहने अपेक्षा गरे ।

गण्डकी धौलागिरी पेट्रोलियम डिलर्स एसोसिएसन अध्यक्ष राजन गोंगजूले एसोसिएसनमा हाल ८० पेट्रोलियम कम्पनी आबद्ध रहेको जनाए । उनले नेपालमा पेट्रोलियम पदार्थको कारोबार गरेको ५५ वर्षमात्र भएको जानकारी दिँदै गण्डकी पेट्रोलियमले स्थापनाको ५० वर्ष मनाइरहँदा खुसी लागेको प्रतिक्रिया दिए ।

गोरखा स्मारक ट्रस्टका महासचिव प्राडा चन्द्रबहादुर गुरुङले कम्पनीको स्वर्ण महोत्सव अवसरमा शुभकामना दिए । उनले भूपूहरुको इतिहासबारे जानकारी दिँदै पोखराको विकासमा भूपूहरुको ठूलो योगदान रहेको पनि बताए ।

भूगोलविद प्राडा कृष्ण केसीले पोखरा र यस आसपासका क्षेत्रमा मेजर वीरसिंह गुरुङको अतुलनीय योगदान रहेको चर्चा गरे । मेजर वीरसिंह गुरुङ स्मृति प्रतिष्ठानका अध्यक्ष समेत रहेका प्राडा केसीले हालको अमरसिंह स्कुल होस् वा पश्चिमाञ्चल क्षेत्रीय अस्पताल उनकै पहलमा स्थापना भएको बताए ।

कम्पनीका संस्थापक सचिव शंकर गुरुङले संस्था स्थापनाको इतिहासबारे चर्चा गरे । पोखराको पहिलो पेट्रोलियम कम्पनी हिमालय भएकोमा दोस्रो गण्डकी रहेको बताए ।

कम्पनीका संस्थापक ५० शेयर सदस्यमध्येका एक ह.हंसबहादुर गुरुङले कम्पनी स्थापनाका संघर्ष, दुःख र कहानी पस्के । २५ वर्षदेखि कम्पनी सचिवहुँदै प्रबन्धकको जिम्मेवारी सम्हालेका ९० वर्षीय गुरुङले पोखरा पृथ्वीचोकमा पहिलोपल्ट पम्प गाड्न खाल्डो खन्दै गर्दा तत्कालीन अञ्चलाधीश शंकरराज पाठकले रोकेको स्मरण गरे ।

नेपाल ओलम्पिक कमिटी उपाध्यक्ष समेत रहेका कम्पनीका शेयर सदस्य तेजबहादुर गुरुङले भूपू सैनिकको सक्रियतामा तत्कालीन समयमा कम्पनी स्थापना हुनु ज्यादै गर्वको विषय भएको बताए । उनले आफू सानो छँदा बुवाले कम्पनीका बारेमा सुनाएका कुराहरु स्मरण गरे ।

सो अवसरमा कम्पनीले प्रकाशन गरेको ‘स्वर्ण महोत्सव स्मारिका–२०८१’ विमोचन गरियो । ९० पृष्ठको स्मारिकामा कम्पनीको इतिहास, पोखरामा पेट्रोलियम कम्पनीको इतिहास, पोखराको विकासमा भूपू लाहुरेको योगदान, मेजर वीरसिंहको चर्चा, विभिन्न तथ्य तथ्यांक लगायत विषयवस्तु समेटिएको छ ।

स्मारिका प्रकाशनका लागि कम्पनीका कार्यसमिति सदस्य एवं शेयर सदस्य तेजबहादुर गुरुङको संयोजकत्वमा प्रकाशन मण्डल गठन गरिएको थियो । सो प्रकाशन मण्डलमा तीलबहादुर गुरुङ, नारायणप्रसाद गुरुङ, तेजमान गुरुङ, दानजङ्ग गुरुङ, सूर्यबहादुर गुरुङ र विजय नेपाल सदस्य थिए ।

सो अवसरमा संस्थाका पूर्व अध्यक्षहरुलाई योगदानको कदर गर्दै मरणोपरान्त सम्मान गरिएको थियो । सम्मानित हुनेमा संस्थापक अध्यक्ष कप.प्रेमबहादुर गुरुङ, पूर्व अध्यक्ष कप. चेतबहादुर गुरुङ र कप.डमरबहादुर गुरुङ छन् । सो सम्मान उनीहरुका परिवारका सदस्यले ग्रहण गरे ।

यस्तै, संस्थापक शेयर सदस्यमध्ये भक्तिमाया गुरुङ (वीरनारी), मीमकुमारी गुरुङ, केशबहादुर गुरुङ र कम्पनी प्रबन्धक एवं संस्थापक शेयर सदस्य ह.हंसबहादुर गुरुङलाई सम्मान गरिएको थियो । कम्पनीका संस्थापक सचिव शंकर गुरुङलाई पनि सम्मान गरियो ।

५० जना शेयर सदस्य मिलेर २०३१ भदौ २७ गते तत्कालीन वाणिज्य विभागमा दर्ता भएको गण्डकी पेट्रोलियम कम्पनीमा हाल ४५ जना शेयर सदस्य छन् । संस्थापकमध्ये हाल ४ जनामात्र जीवित रहेको जानकारी शेयर सदस्य तेजमान गुरुङले दिए ।

कार्यक्रममा संस्थापक सबै शेयर सदस्य तथा तिनका परिवारलाई मायाको चिनो प्रदान गरिएको थियो ।

कार्यक्रममा भारतीय पेन्सन वितरण कार्यालयका भरतभूषण पाण्डे (बिबी पाण्डे), शेयर सदस्य, विभिन्न संघसंस्थाका प्रतिनिधिको उपस्थिति थियो ।

संस्थाका अध्यक्ष सु.गणेशबहादुर गुरुङको अध्यक्षतामा भएको कार्यक्रमको संचालन शेयर सदस्य नारायणप्रसाद गुरुङले गरेका थिए ।
गण्डकी पेट्रोलियम कम्पनी हाल पोखरा १०, अमरसिंह चोकमा छ ।