पोखरा । पेरिस पारा ओलम्पिक–२०२४ मा ऐतिहासिक कास्य पदक दिलाउन सफल पलेशा गोवर्धन र प्रशिक्षक कविराज नेगी लामालाई पोखरामा सम्मान गरिने भएको छ ।

गण्डकी प्रदेश तेक्वान्दो संघ आयोजना एवं कास्की जिल्ला तेक्वान्दो संघ सहयोगमा आइतबार बिहान पोखरा रंगशालामा हुने समारोहमा उनीहरुलाई सम्मान गर्न लागिएको गण्डकी प्रदेश तेक्वान्दो संघका महासचिव रमेश पौडेलले जानकारी दिए ।

गण्डकीका मुख्यमन्त्री सुरेन्द्रराज पाण्डेको प्रमुख आतिथ्यमा हुने सो समारोहमा प्रदेश सरकारतर्फबाट समेत मुख्यमन्त्री पाण्डेले नगद तथा सम्मानपत्रबाट सम्मान गर्ने कार्यक्रम रहेको संघ अध्यक्ष जगनबहादुर गुरुङले बताए ।

कार्यक्रममा सामाजिक विकास, युवा तथा खेलकुदमन्त्री बिन्दुकुमार थापा र पोखरा महानगरपालिकाका मेयर धनराज आचार्य, गण्डकी प्रदेश खेलकुद परिषद् र महानगरका विभिन्न वडा र पोखरास्थित संघसंस्था, उद्योग व्यवसायी लगायत खेलकुदप्रेमीले समेत आर्थिक रुपमा खेलाडी पेलशा र प्रशिक्षक कविराजलाई सम्मान गर्ने प्रदेश तेक्वान्दो संघ महासचिव पौडेलले जनाए । विभिन्न खेल संघ र खेलाडीबीच छलफल गरी कार्यक्रम तयारी तीव्र पारिएको जिल्ला अध्यक्ष कुमार गुरुङले बताए ।

पेरिस पारा ओलम्पिकमा तेक्वान्दोको ४४ विधाअन्तर्गत महिला ५७ केजीमुनिको प्रतिस्पर्धामा काठमाडौंकी पलेसाले ऐतिहासिक कास्य जितेकी हुन् ।

नेपाल तेक्वान्दो संघले उनलाई १० लाख र प्रशिक्षक कविराजलाई ३ लाख नगदसहित सम्मान गरिसकेको छ । नेपाल सरकारले समेत ६५ लाखसहित सम्मान गरिसकेको छ ।