पोखरा । नारी उत्थान दिदीबहिनी समाजसेवा पुरस्कार–२०८१ बाट विना सिलवाल सम्मानित हुने भएकी छन् ।

पोखरा छोरेपाटनस्थित नारी उत्थान दिदीबहिनी समूहद्वारा स्थापित सो पुरस्कार गतवर्षदेखि प्रदान गरिँदै आएको छ । पुरस्कारका लागि प्रतिभा छनोट समिति संयोजक छन्दनायक माधव वियोगीको अध्यक्षतामा बसेको समितिको बैठकले सिफारिस गरे अनुसार बिहीबार बसेको समूहको बैठकले सो निर्णय गरेको हो । छनोट समितिमा संस्था अध्यक्ष जानुका पौडेल, प्रमुख संरक्षक सरिता घिमिरे र सल्लाहकार अधिवक्ता जानकी शर्मा सदस्य थिए ।

कोपिला नेपालसहित विभिन्न सामाजिक संघसंस्थामा आबद्ध रही करिब ४० वर्षदेखि अन्यायमा परेकालाई न्याय दिलाउन, महिलाको हकहितको संरक्षण गर्न, महिला हिंसाविरुद्ध लड्न तथा सबल र सक्षम बनाउन उल्लेख्य योगदान दिएकोमा सोको कदर गर्दै उनलाई पुरस्कृत गर्न लागिएको संस्थाकी अध्यक्ष जानुका पौडेलले जानकारी दिइन् ।

सो पुरस्कार गत वर्ष प्रथम पटक सुष्मा पौडेललाई प्रदान गरिएको थियो । पुरस्कार संस्थाको स्थापना दिवस सन्दर्भमा ५ असोजमा बेलघारीमा हुने समारोहमा प्रदान गरिनेछ ।