पोखरा । पोखरा अन्तर्राष्ट्रिय विमानस्थल सञ्चालन आएसँगै रोकिएको प्याराग्लाइडिङमा सोलो उडान खुला गर्न माग गरिएको छ ।

नेपाल हवाई खेलकुद संस्था (ना) को मंगलबार २१ औं साधारण सभा तथा १० औं अधिवेशन समारोहमा बोल्दै संस्इथा अध्यक्ष सुनिलबहादुर भट्टराईले सो माग गरे ।

उनले पर्यटनको राजधानी पोखराको पर्यटन उकास्ने हो भने सोलो उडान खोल्नुको विकल्प नरहेको तर्क गरे । उनले पोखरामा प्याराग्लाइडिङको सोलो उडान नहुँदा विदेशी पर्यटकको आगमन कम भएको दाबी गरे । यस्तै, नयाँ जनशक्ति उत्पादनमासमेत समस्या परेको उनले बताए ।

सराङकोट र तोरीपानीबाट प्याराग्लाइडिङ उडान बन्द गर्दा त्यसको असर सिंगो व्यवसायमा परेको बताए । तर फेरि तोरीपानीबाटै उडान हुँदा केहि उत्साह थपिए पनि ल्यान्डिङ टाढा भएको गुनासो गरे । उनले फेवाताल किनार खपौंदीमै ल्याण्डिङ गर्ने वातावरण मिलाउन माग गरे ।

त्यसअघि सभाको उद्घाटन गर्दै गण्डकी प्रदेशका सामाजिक विकास, युवा तथा खेलकुद मन्त्री विन्दुकुमार थापाले पोखराको पर्यटनमा प्याराग्लाईडिङ खम्बाको रुपमा रहेको बताए । उनले यसको संरक्षण र प्रवद्र्धन गरेरै यहाँको पर्यटनलाई माथि उकास्न सकिने बताए । उनले यसका लागि प्रदेश सरकार यहाँहरुलाई सहयोग गर्न तयार रहेको आश्वासन दिए ।

पोखरा उद्योग वाणिज्य संघमा अध्यक्षका प्रत्यासी अर्जुन पोखरेलले आफू अध्यक्ष बने प्याराग्लाइडिङलाई उच्च प्राथमिकता दिएर योजना र कार्यक्रम ल्याउने योजना सुनाए ।

पोखरा पर्यटन परिषदका नवनिर्वाचित अध्यक्ष तारानाथ पहारीले प्याराग्लाईडिङ पोखराको पर्यटनको मेरुदण्ड भएको बताए । यसलाई बलियो बनाउन सकेमात्र पोखराको पर्यटनले गति लिने उनको भनाइ थियो ।

यसैबीच, नाले पत्रकारद्वय अमृत सुवेदी र परशुराम शर्मालाई सम्मान गरेको छ । पत्रकारितामार्फत पोखराको पर्यटनमा महत्वपूर्ण योगदान गरेकोमा सम्मान गरिएको हो । सुवेदी अनलाइन खबर गण्डकीका ब्यूरो प्रमुख हुन् भने शर्मा नेपाल टेलिभिजनका कास्की संवाददाता हुन् । उनीहरुलाई सामाजिक विकास, युवा तथा खेलकुद मन्त्री विन्दुकुमार थापालगायतले सम्मान गरे ।