पोखरा । पोखरामा सोमबारदेखि ‘दशौं राष्ट्रिय हाप्किडो सेमिनार’ सुरु भएको छ । २ दिनसम्म चल्ने सेमिनार हाप्किडोका प्रशिक्षक, रेफ्रि तथा नेतृत्व क्षमता अभिवृद्धि गर्ने उद्देश्यका साथ सुरु भएको हो । सेमिनारमा सातै प्रदेशबाट २ सयभन्दा बढीको सहभागिता छ ।

सेमिनारको गण्डकी प्रदेश सरकारका सामाजिक विकास, युवा तथा खेलकुद मन्त्री विन्दुकुमार थापाले उद्घाटन गर्दै १० औं राष्ट्रिय खेलकुद केही कारणले तोकिएको समयमा नहुने जस्तै देखिएको बताए । तर पनि उनले आफूहरुले तयारी भने छोड्नु हुन्न भने ।

मन्त्री थापाले नेपाली हाप्किडोले छोटो समयमा नै नेपाली खेलकुदमा महत्वपूर्ण रुपमा विकास गरेकोप्रति प्रशंसा व्यक्त गर्दै दशौं राष्ट्रिय खेलकुदमा समावेश गर्न आफ्नो तर्फबाट पूर्ण सहयोग रहने प्रतिबद्धता जनाए ।

पोखरालाई खेलकुद शहरको रुपमा अघि बढाउन प्रचूर सम्भावना रहेको मात्रै नभई सबैको ध्यान त्यसतर्फ खिच्नसमेत सफल रहेको पछिल्लो समय यहाँ हुने खेलकुद गतिविधिले समेत त्यसलाई पुष्टि गरेको उल्लेख गरे । खेलकुद माध्यमबाट भाइचारा सम्बन्ध स्थापित गर्न भूमिका खेल्ने भएकोले गण्डकी प्रदेश सरकार सदैव खेलाडीहरुको हित र खेलकुद विकासका लागि प्रतिवद्ध रहेको मन्त्री थापाले जनाए ।

कार्यक्रममा प्रदेश खेलकुद परिषदका सदस्य एवं पत्रकार केशव पाठक, कास्की जिल्ला हाप्किडो संघ अध्यक्ष रवीन गुरुङलगायतले आफ्ना भनाइ राखेका थिए ।

नेपाल हाप्किडो संघ केन्द्रीय अध्यक्ष कालीबहादुर घर्ती मगरको अध्यक्षतामा भएको कार्यक्रममा विभिन्न सांस्कृतिक कार्यक्रम लगायत हाप्किडो खेलको प्रदर्शन गरिएको थियो ।

सो अवसरमा अध्यक्ष मगरले नेपाली हप्किडोले पछिल्लो समयमा राष्ट्रिय र अन्तर्राष्ट्रियस्तरमा आफ्नो छाप छोड्न सफल भएको जनाउँदै हाप्किडो खेलको विकास र विस्तारका लागि राज्यको भूमिका आवश्यक रहेको औंल्याए ।