पोखरा । इन्टर रिकभरिङ फुटसल प्रतियोगितामा पोखरा फेलिसिप च्याम्पियन भएको छ ।

पोखरा ४ गणेशटोलस्थित स्पोर्टस् क्यासलमा मंगलबार फाइनलमा लमजुङ फेलोसिपलाई ३–० गोलअन्तरले पराजित गर्दै पोखरा फेलोसिप च्याम्पियन बनेको हो ।

जितमा कुशल परियारले २ र राजेश खाँडले १ गोल गरे । उपाधिसँगै पोखराले ४० हजार, शिल्ड, मेडल तथा प्रमाणपत्र प्राप्त गरेको छ ।

उपविजेता लमजुङ फेलोसिपले २० हजार, शिल्ड, मेडल तथा प्रमाणपत्र हात पा¥यो ।

१५ टिमले भाग लिएको प्रतियोगितामा पोखरा फेलोसिपका राजेश खाँड सर्वाेत्कृष्ट खेलाडी घोषित भए । उत्कृष्ट गोलरक्षक सोही टिमका संजोग क्षत्री, सर्वाधिक गोलकर्ता लमजुङ फेलोसिपका सरोज गुरुङ पुरस्कृत भए । विजेता तथा उपविजेता टोलीलाई समापन समारोहका प्रमुख अतिथिसमेत रहेका कफि डि हिमालयका सञ्चालक शंकर गुरुङ, रिकभरिङ नेपालका निवर्तमान अध्यक्ष शिव न्यौपाने, युवा नेता आशिक गुरुङ, समाजसेवी विजया गुरुङ तथा सहयोगीदाताहरुले पुरस्कार वितरण गरे ।

लागुऔषध सेवनपछि रिकभरि चरणमा रहेका युवालाई सकारात्मक सन्देश दिने उद्देश्यसहित कुशल परियार र आविष्कार गुरुङले उक्त प्रतियोगिता आयोजना गरेका थिए ।