पोखरा । उच्च शिक्षाका लागि पोखरामा नयाँ कलेज स्थापना गरिएको छ । पोखरा–३, नदीपुरमा गेन्स (गण्डकी एकेडेमी अफ् इन्टरडिसीपिनरी स्टडिज) कलेज स्थापना गरिएको हो ।

कलेजले सुदूरपश्चिम विश्वविद्यालयबाट हालै सम्बन्धन लिएर एमबिए, बिबिए र बिएस्सी सिएसआइटी विषय पढाउने भएको छ । कलेजमा बिएस्सी व्यवस्थापनतर्फ ४ वर्षे (८ सेमेस्टर), बिएस्सी सिएसआइटी (कम्प्युटर साइन्स एण्ड इन्फरमेसन टेक्नोलोजी) तर्फ ४ वर्षे (८ सेमेस्टर) तथा एमबिएअन्तर्गत २ वर्षे (४ सेमेष्टर) मा अध्ययन हुने कलेज प्रमुख विजय आनन्द शर्माले बताए ।

कलेज प्रमुख विजय आनन्द शर्मा

आफूहरुले ज्याक मेजीरोको फिलोसफी (दर्शन) अन्तर्गत विद्यार्थीमा आधारभूत रुपान्तरित शिक्षा प्रदान गर्ने उद्देश्यका साथ कलेज स्थापना गरेको कलेज प्रमुख शर्माले बताए । उक्त दर्शन अवलम्बनले गर्दा विद्यार्थीको व्यक्तित्वमै परिवर्तन आउने उनको विश्वास छ । कलेजका अध्यक्ष कमलराज सापकोटा छन् ।

कलेजमार्फत विद्यार्थीको व्यवहारमा परिवर्तन आउने, सिकाइका लागि विद्यार्थीलाई बढी जिम्मेवार बनाइने, व्यावहारिक तरिकाले बेलाबेलामा समूह कार्य गराइने, खुशी वातावरणमा जोस् जाँगरले आगमन विधिमार्फत पठनपाठन हुने कलेजले जनाएको छ ।

साथै भविष्यमा के बन्ने, कसरी बन्ने, किन बन्ने, कसरी उद्यमी हुने, उद्यमी बन्दा व्यक्ति, समाज र राष्ट्रलाई समग्रमा के फाइदा हुन्छ, असल नागरिकका दायित्वहरु के–के हुन् लगायतबारे पनि पठनपाठन सकिएपछि नियमित सहजीकरण व्यवस्था गरिएको छ ।

उच्च शिक्षाका लागि गेन्स कलेज पोखराकै महत्वपूर्ण थलो बन्ने प्रमुख शर्माको दाबी छ । ‘हामी नयाँ छौं, अनुभवी टिम पनि छ, नेपाल सरकारको स्वामित्वमा रहेको विश्वविद्यालयबाट सम्बन्धन लिएकाले शिक्षण शुल्क पनि तुलनात्मक सर्वसुलभ छ,’ प्रमुख शर्माले भने ।

कलेजले बिबिए अध्ययनका लागि ३ लाख ९७ हजार, बिएस्सी सिएसआइटीका लागि ५ लाख ५३ हजार तथा एमबिएका लागि ३ लाख ५० हजार एकमुष्ट शुल्क तोकेको छ ।