पोखरा । पोखरा–२५, हेमजास्थित महिला सञ्जाल आयोजना तथा विष्णुपादुका क्लब सहआयोजनामा शुक्रबार भएको खुला तीजगीत प्रतियोगितामा कमलजौसी आमा समूह प्रथम भएको छ ।

प्रतियोगितामा देउराली आमा समूह द्वितीय र शान्ति आमा समूह तृतीय भए । राधाकृष्ण आमा समूह तथा जनकल्याण आमा समूह सान्त्वना भए । प्रथम, द्वितीय, तृतीय र सान्त्वनाले क्रमशः २० हजार, १५ हजार, १० हजार, ५ हजारसाथमा प्रमाणपत्र पुरस्कार पाए।

प्रतियोगिताअन्तर्गत नृत्यतर्फ प्रगतिशील आमा समूह प्रथम, स्वरतर्फ इन्द्रेणी आमा समूह पहिलो साथै उत्कृष्ट भेषभूषातर्फको पुरस्कार दहरे देउराली आमा समूहले हात पारेको छ ।

त्यस्तै, दर्शकदीर्घबाट नृत्यतर्फ तारा ढुंगाना र मैयाँ तिमिल्सीनाले साडी, कल्पना भण्डारीले चप्पल, राधा बास्तोलाले झोला तथा विष्णु ढकाल र कमला भट्टराईले नगद पुरस्कार प्राप्त गर्न सफल भएको निर्णायक संयोजक गायक परशुराम अधिकारीले जानकारी दिए । प्रतियोगितामा गायक अधिकारीसँगै ज्ञानसरा जुग्जाली र लक्ष्मी सुवेदीले निर्णयक थिए ।

मेला उद्घाटन गर्दै पोखरा २५ की कावा वडाध्यक्ष समेत रहेकी पोखरा महानगरकार्यपालिका सदस्य धना पोख्रेल तिमिल्सिनाले कला संस्कृतिलाई बचाउन मेलाको भूमिका रहने औँल्याउँदै संस्कार संस्कृतिलाई जीवन्त राख्नुपर्ने बताइन् ।

‘उपमेयरसँग महिला कार्यक्रम’ मार्फत वडाका महिलादिदीबहिनीका समस्या समाधान गर्न आफूले प्रयास गर्ने जनाउँदै उनले विष्णुपादुका क्लवको भवन निर्माणमा वडाले समन्वय गर्ने विश्वास दिलाइन् । उनले वडाको सहयोगमा दुई संस्था (सञ्जाल र क्लब) मिली कार्यक्रम आयोजना गरेकोमा खुशी व्यक्त गरिन् ।

विष्णुपादुका क्लब सचिव वसन्तकुमार श्रेष्ठले क्लब जीर्ण भवनबाट संचालन गर्नुपरेकोमा दुखेसो प्रकट गरे । उनले वडाले नयाँ भवन निर्माणका लागि सहजीकरण गर्नुपर्ने बताए । क्लबले सञ्जालका गतिविधिमा सबैखाले सहयोग गर्न तयारी रहेको प्रतिबद्धता पनि उनले गरे ।

सञ्जाल अध्यक्ष अप्सरा तिमिल्सिनाले वडा, विष्णुपादुका क्लब, विभिन्न सहयोगी संघसंस्था एवं व्यक्तिको सहयोगमा मेला आयोजना गरिएको जनाउँदै सबैलाई धन्यवाद दिइन् ।

प्रथम पुरस्कार प्रायोजक भोजकुमारी त्रिपाठीले महिलाहरु आत्मनिर्भर हुनुपर्नेमा जोड दिँदै यसका लागि स्वरोजगारको बाटो खोेज्नुपर्ने स्पष्ट पारिन् । मानव सेवा आश्रमका प्रतिनिधि मदन थापाले सहयोग आफैँमा महत्वपूर्ण हुने धारणा राख्दै दीनदुःखीको सेवा गर्दा वास्तविक धर्म मिल्ने जनाए ।

त्यस अवसरमा नेपाल पत्रकार महासंघका केन्द्रीय सदस्य सरिता तिम्सिना पगेनी, नेकपा एमालेका वडाध्यक्ष ऋषिराम पौडेल, राष्ट्रिय स्वतन्त्र पार्टी वडा सभापति भरतराज अधिकारी लगायतले पनि तीजको महत्वबारे प्रकाश पारे । कार्यक्रमबीच १२ औं राष्ट्रिय हेमजा आलु महोत्सव झाँकी ¥यालीका सहभागी आमा समूह, बाल समुह, भजन समूह एवम् सामाजिक संघसंस्थालाई विष्णुपादुका क्लबले खैजरी, मुजुरा लगायतका सामग्री प्रदान ग¥यो ।

महिला सञ्जाल अध्यक्ष तिमिल्सिनाको अध्यक्षतामा भएको उक्त कार्यक्रममा गंगा त्रिपाठीले स्वागत गीत, सञ्जाल सहसचिव शान्ता केसीले स्वागत मन्तव्य तथा भगवती बजगाई अधिकारी र सञ्जाल सचिव उमा भूर्तेल पौडेलले संयुक्तरुपमा कार्यक्रम सञ्चालन गरे ।