पोखरा । नेपालमै पहिलोपल्ट यस वर्षको अन्तर्राष्ट्रिय एस्ट्रोनोमी ओलम्प्याड हुने भएको छ । आगामी १७–२४ असोज (३–१० अक्टोबर) सम्म काठमाडौंमा तेस्रो अन्तर्राष्ट्रिय ओलम्प्याड (एस्ट्रोनोमी एण्ड एस्ट्रोफिजिक्स) हुन लागेको नेपाल अष्ट्रोनोमिकल सोसाइटी (नासो) का गण्डकी प्रदेश संयोजक राजकुमार ढकालले जानकारी दिए ।

प्रत्येक वर्ष सिनियर (कक्षा १२–१२) र जुनियर तह (कक्षा १० सम्म) का विद्यार्थीहरुका लागि हुने अन्तर्राष्ट्रिय ओलम्प्याडमा विद्यार्थी सहभागी गराउने जिम्मा नेपालका लागि नासोले पाएको छ ।

नासोले सोको लागि प्रत्येक वर्ष मुलुकभरिका विद्यार्थीमाझ विभिन्न चरणमा प्रतिस्पर्धा गराई राष्ट्रिय टिम छनोट गर्ने गर्छ । यस वर्ष सिनियर (कक्षा ११–१२) का विद्यार्थीको अन्तर्राष्ट्रिय ओलम्प्याड भर्खरमात्र ब्राजिलमा सम्पन्न भयो । जसमा यहाँबाट एकमात्र विद्यार्थी गण्डकी बोर्डिङ स्कुल, पोखराकी श्रीषा कोइराला पनि सहभागी थिइन् । अघिल्लो वर्ष गण्डकी बोर्डिङकै सुदीप रोकायाले अन्तर्राष्ट्रिय एस्ट्रोनोमी ओलम्प्याडमा भाग लिएका थिए ।

जुनियर तह (कक्षा १० सम्म) का विद्यार्थीको अन्तर्राष्ट्रिय ओलम्प्याड भने नेपालमै पहिलो पल्ट काठमाडौंमा हुने भएकाले आफूहरु उत्साहित भएको प्रदेश संयोजक ढकालले बताए । उक्त ओलम्प्याडमा विभिन्न २५ देशका विद्यार्थी, शिक्षक र मेन्टर गरी करिब २ सय जनाले भाग लिने छन् । राष्ट्रिय टिमका लागि भएको ११ औं राष्ट्रिय ओलम्प्याडबाट ६ जना विद्यार्थीको छनोट भइसकेको छ ।

यस क्षेत्रमा गण्डकी बोर्डिङका विरवी कँडेल र मदरल्याण्ड मावि, पोखराका शास्वत रेग्मीले नेपाली टोलीको प्रतिनिधित्व गर्नेसमेत नासो गण्डकी संयोजक ढकालले बताए । उनीहरु दुवै जना कक्षा १० अध्ययनरत् छन् ।

नेपाल अष्ट्रोनोमिकल सोसाइटी (नासो) ले नेशनल एस्ट्रोनोमी ओलम्प्याड तथा केमेस्ट्री र बायोलोजीतर्फको ओलम्प्याड इस्टानले आयोजना गर्दै आएका छन् । दुवैतर्फ गण्डकी प्रदेशको जिम्मेवारी उनै ढकालले पाएका छन् ।

यहाँबाट २०१४ देखि यो सहभागिता जनाउन थालिएको थियो । अन्तर्राष्ट्रिय एस्ट्रोनोमी ओलम्प्याड पहिले सिनियरबीच मात्र हुने गरेकोमा तेस्रो संस्करणयता जुनियरतर्फको पनि हुन थालेको हो ।
नासो गण्डकी प्रदेश संयोजक राजकुमार ढकाल भन्छन्, ‘ओलम्प्डमा भाग लिनु भनेको विद्यार्थीको भाग्य चम्किनु हो । यसबाट विभिन्न क्याटागोरीमा विद्यार्थी पुरस्कृत हुने गर्दछन् भने भविष्यमा विदेशका विभिन्न विश्वविद्यालयले पनि छात्रवृत्तिका लागि अफर गर्ने गर्दछन् ।’