पोखरा । पोखरा महानगरपालिका वडा १३ ले घुम्ती सेवा प्रवाह गरेको छ । अशक्त जेष्ठ नागरिक तथा फरक क्षमता भएका सामाजिक सुरक्षा भत्ता लाभग्राही नागरिकलाई घरमै पुगेर सेवा दिइएको वडाध्यक्ष किरण बरालले जानकारी गराए ।

घरमै वडाको सेवा पाउँदा नागरिकसमेत खुसी छन् । सामाजिक सुरक्षा भत्ताकै लागि वडा धाउनुपर्ने समस्याबाट मुक्ति मिलेको छ । वडासचिव, वडा सदस्य लगायतका कर्मचारीहरु स्थानीयकै घरमा गएर सेवा दिएको बताइएको छ ।

वडाको गतिविधिले स्थानीयलाई सरकार घरमा नै आएको आभाष भएको र संघीयताको मर्मअनुसार सेवा प्रवाह गर्न पाउँदा खुसी लागेको वडाध्यक्ष बरालको प्रतिक्रिया छ ।

‘हामी नागरिकको सेवामा तल्लिन छौं । नागरिकलाई कसरी हुन्छ, सरल र सहज रुपमा सेवा प्रवाह गर्ने सोच हाम्रो हो । आशा छ हामीले सुरु गरेको घुम्ती सेवा प्रभावकारी बन्नेछ,’ वडाध्यक्ष बरालले भने ।

वडाले घुम्ती सेवालाई निरन्तरता दिने प्रतिबद्धता समेत उनको छ । नमुना वडाको रुपमा रहेको वडा १३ ले सामाजिक, सांस्कृतिक, धार्मिक पक्षलाई पनि सुदृढ बनाउँदै लगेको छ ।