पोखरा । युनाइटेड क्लब पोखरा अध्यक्षमा लोकबहादुर थापा निर्वाचित भएका छन् । क्लबको १५ औं साधारण सभा तथा सातौं अधिवेशनबाट थापा सर्वसम्मतरुपमा अध्यक्ष निर्वाचित भएका हुन् । वरिष्ठ उपाध्यक्षमा गणेश तिमिल्सिना, प्रथम उपाध्यक्षमा शान्तबहादुर थापा, द्वितीय उपाध्यक्षमा सूर्यबहादुर बानियाँ, महासचिवमा दिनेश सुनार, कोषाध्यक्षमा जयराम आचार्य, सचिवमा सन्तोष कार्की र सहकोषाध्यक्षमा सीमा गुरुङ निर्वाचित भए ।

कार्यसमिति सदस्यमा विष्णुकुमार गुरुङ, पूर्णकुमार श्रेष्ठ, शिव थापा, पदमबहादुर कार्की (विजय), शान्ति सुवेदी, बुद्ध कार्की, रिमबहादुर क्षत्री, गणेश खड्का र सुरेश थापा निर्वाचित भए ।

क्लबका संस्थापक अध्यक्ष हिमालय बख्रेल निर्वाचन संयोजक, निवर्तमान अध्यक्ष लालकाजी गुरुङ र पूर्व अध्यक्ष सुकबहादुर गुरुङ सदस्य रहेको निर्वाचन समितिले निर्वाचित कार्यसमितिको पद तथा गोननीयताको सपथ ग्रहण गराएको छ ।

यसअघि, साधारणसभा उद्घाटन गर्दै नेपाल संगीत तथा नाट्य प्रज्ञा प्रतिष्ठानका पूर्व कुलपति प्राज्ञ सरुभक्त श्रेष्ठले युनाइटेड क्लबले सामाजिक कामको माध्यमबाट अब्बल बनाउन सक्षम भएको बताए । उनले युवाले चाहे कुनै पनि काम सफल हुने बताए ।

पोखरा १० का अध्यक्ष राजेश गुरुङले युनाइटेड क्लब र समाजसेवा एकअर्काका पर्यायवाची हो भने । उनले क्लबसँग आगामी दिनमा पनि सहकार्य गरेरै अगाडि बढ्ने प्रतिबद्धता जनाए ।

संस्थापक अध्यक्ष बख्रेलले युनाइटेड क्लबले लिएको मुख्य एजेण्डा खुला चिडियाखानाले चिडियाखानाको रुपमा नभइ उद्धार केन्द्रको रुपमा विकास भइरहेको बताउँदै त्यसतर्फ सम्बन्धित निकायको ध्यानाकर्षण गराए । उनले शिक्षा, स्वास्थ्य, खेलकुद र पर्यटनमा उल्लेख्य काम गर्दै आइरहेको भएता पनि क्लबले शिक्षाको क्षेत्रमा देशकै नमुनाको रुपमा गरिब तथा जेहेनदार विद्यार्थीलाई लक्षित गरी प्राविधिक विद्यालयको थालनी गर्ने र उक्त योजनाको लागि क्लबले ८ रोपनी जग्गा खरिद गरी योजना अगाडि विस्तृत परियोजना प्रतिवेदन निर्माण सम्पन्न गरी योजनालाई मूर्त रुप दिनेतर्फ लाग्ने बताए ।

निवर्तमान अध्यक्ष लालकाजी गुरुङले क्लबमा आवद्ध सम्पूर्ण एकजुट भएर अगाडि बढेकै कारण आजसम्म सफलता पाइरहेको बताए ।

अमरसिंह मावि विद्यालय व्यवस्थापन समिति अध्यक्ष कृष्ण कोइरालाले क्लबले पोखरा महोत्सवकै आयोजना गरी सामाजिक काम गर्दै आइरहँदा त्यसमा अमरसिंह माविकको समेत प्रत्यक्ष तथा अप्रत्यक्ष संलग्नता रहेको बताए ।

समाज कल्याण परिषद् अध्यक्ष राजेन्द्रबहादुर कार्कीले युनाइटेड क्लब पोखरामा अब्बल सामाजिक संस्थाको रुपमा रहेको बताए ।

कार्यक्रममा वडा प्रहरी कार्यालय रामबजारका प्रमुख प्रहरी निरीक्षक वीरेन्द्र घिमिरे, सल्लाहकार सम्मरबहादुर श्रेष्ठ, क्लबका पूर्व अध्यक्ष सुकबहादुर गुरुङले पनि बोलेका थिए ।

सो अवसरमा क्लबको सुरुवात दिनमा महत्वपूर्ण भूमिकामा रही सहयोग गर्दै आएकोमा क्लबका पूर्व सल्लाहकार विश्वप्रकाश लामिछाने र आजीवन सदस्य शंकर मानन्धरलाई सम्मान गरिएको थियो ।

कार्यक्रममा क्लबका अध्यक्ष राजु श्रेष्ठले अध्यक्षको प्रतिवेदन, कोषाध्यक्ष सूुर्यबहादुर बानियाँले कोषाध्यक्षको प्रतिवेदन र महासचिव दिनेश सुनारले महासचिवको प्रतिवेदन प्रस्तुत गरेका थिए ।

युनाइटेड क्लबले बर्सेनि पोखराको अमरसिंहचौरमा पोखरा महोत्सव आयोजना गर्दै आएको छ ।