पोखरा । बाटुलेचौरमा ऐतिहासिक बाटुलेचौर तीज मेलामा प्रथम अन्तरक्लब ह्याण्डबल प्रतियोगिता सुरु भएको छ । लिग चरणमा आधारमा खेलाइने ह्याण्डबलमा ५ टिमले भाग लिएको प्रतियोगिता संयोजक अनिल बस्नेतले बताए ।

वडा कार्यालय, पोखरा १६ को संरक्षकत्वमा स्थानीय वडहरबोट आमा समूह आयोजनामा तीज मेला आयोजना गरिएको छ ।

२१ भदौसम्म बाटुलेचौर खेल मैदानमा हुने मेलाको बुधबार गण्डकी प्रदेशका सामाजिक विकास युवा तथा खेलकुद मन्त्री विन्दुकुमार थापाले गर्ने कार्यक्रम छ । समापन समारोहमा कोशी प्रदेशका पूर्व प्रदेश प्रमुख सोमनाथ अधिकारी प्यासी आउने छन् ।

सो अवसरमा अन्तरविद्यालय लोकनृत्य र सांस्कृतिक कार्यक्रम साथमा सम्मान कार्यक्रम र अन्तिम दिन तीज गीत तथा नृत्य प्रस्तुति रहने प्रचार संयोजक सञ्जय थापाले बताए ।

मेलामा स्थानीय कलाकारको सांगीतिक प्रस्तुति समेत रहने छ ।

मेला अवसरमा वडा कार्यालयले वडाभित्रका विद्यावारिधि गरेका करिब २५ जना व्यक्तिलाई सम्मान र सामुदायिक विद्यालयतर्फ नेपालमै उत्कृष्ट विन्ध्यवासिनी मावि र कास्कीमा उत्कृष्ट इन्द्रराज्य लक्ष्मी माविलाई सम्मान गर्ने वडाध्यक्ष अमृत शर्मा तिमिल्सिनाले बताए ।

वडा कार्यालयको संरक्षकत्वमा वडाभित्रका आमा समूहलाई नै आयोजक र सहआयोजकको जिम्मा दिई ४ दिनसम्म मेला संचालन गरिएको मूल आयोजक समितिका संयोजक वडा सदस्य राजकुमारी बानियाँले बताए ।

आयोजक बडहरबोट आमा समूह अध्यक्ष कमला तिमिल्सिनाले वडा प्रतिनिधि तथा स्थानीयले महिलाप्रति गरेको विश्वास कायम राख्दै मेला सफल बनाउन वडाभरिका महिलाहरु उत्साहित भएर लागेको बताइन् ।

मेला संचालनका लागि करिब १३ लाख खर्च लाग्ने र सो रकम विभिन्न सहयोगदाताबाट संकलन गरिने वडा सदस्य एवं अर्थ संकलन उपसमिति संयोजक रामचन्द्र आचार्यले बताए ।

शाहकालीन इतिहास जोडिएको बाटुलेचौर तीज मेला मुलुककै पुरानो तीज मेला हो । यसले समग्र यस क्षेत्रकै संस्कृति धानेकाले पनि मेलालाई निरन्तरता दिन आवश्यक रहेको वडाध्यक्ष तिमिल्सिनाले बताए । मेलामा तीज परम्परागत हम्काइलो भाकासमेत प्रस्तुत गरिने छ । हम्काइलो भाका प्रस्तुतिका लागि स्थानीय ज्येष्ठ महिलाले तयारी सुरु गरेका छन् ।