पोखरा । तीजको अवसरमा राम मन्दिर माछापुच्छ्रे महिला समूह पोखरा १०, १५ आयोजनामा ३३ औं संस्करणको तीज गीत प्रतियोगिता हुने भएको छ ।

पोखरा महानगरपालिकाकोसमन्वय, हिमश्री फुड्स प्रालिको मुख्य प्रायोजनमा २१ भदौमा राम मन्दिर प्राङ्गणमा प्रतियोगिता हुने भएको हो ।

रामबजार क्षेत्रका विभिन्न मन्दिरमा पालैपालो तीज गीत प्रतियोगिता आयोजना गर्ने क्रममा यस वर्ष राममन्दिरमा गर्न लागिएको मंगलबार पत्रकार सम्मेलनमा संस्थाकी अध्यक्ष एवं मूल समारोह समिति अध्यक्ष माया गुरूङले बताइन् ।

२०६४ सालमा स्थापित राम मन्दिर संचालन समितिको भगिनी संस्था राम मन्दिर माछापुच्छ्रे महिला समूहले अन्तरनिहित क्षमता प्रवद्र्धन गर्न प्रतियोगिता आयोजना गर्न लागेको बताइएको छ । रामबजारका सम्पूर्ण संघसंस्थाबीच भातृत्व जगाई संस्थागत विकास गराउन, सामाजिक विकासमा टेवा पु¥याउन, आर्थिक कोष वृद्धि गर्ने पनि कार्यक्रमको उद्देश्य रहेको उनले बताइन् ।

विजेतालाई नगद २५ हजार, उपविजेतालाई २०, तेस्रो हुनेलाई १५ हजार र सान्त्वनालाई ७ हजार पुरस्कार प्रदान गरिने आयोजक संस्थाका सचिव लेकमाया पुनले बताइन् ।

प्रतियोगिता सम्पन्न गर्न करिब ७ लाख ५० हजार खर्च लाग्ने अनुमान गरेको उनले सुनाइन् । प्रतियोगितामा उत्कृष्ट भेषभूषा, उत्कृष्ट नृत्य गर्ने एकएक जनालाई जनही २/२ हजार प्रदान गरिने भएको छ । जसमा करिब २० टिमले भाग लिने अनुमान छ । सहभागी टिमलाई यातायात खर्च वापत १/१ हजार रुपैयाँ प्रदान गरिने आयोजकले जानकारी दिएको छ ।

कार्यक्रम संयोजक रुपा गुरुङले रामबजारको पहिचान धर्म, संस्कृति उत्थानका साथ पोखरा महानगरपालिकाको अति महत्वपूर्ण रमणीय र धार्मिक क्षेत्रले परिचित रामबजारको प्रचारप्रसार गर्न उक्त प्रतियोगिताले थप टेवा पुग्ने बताइन् ।

प्रतियोगिताका परिकल्पनाकारमध्यका मनविर गुरूङले देशमै पहिलोपल्ट तीज गीत प्रतियोगिता गरेको दाबी गरे ।