पोखरा, १८ भदौ । तीज अवसरमा आदर्श समाज (सामाजिक संस्था), पोखरा १२, पुरानोधाराको आयोजनामा ‘१२ औं खुला तीज गीत प्रतियोगिता’ हुने भएको छ ।

मौलिक पर्व तथा संस्कृतिको जगेर्ना गरौं, विकृति विसंगतिरहित तीज पर्व मनाऔं मूल नाराका साथ संस्थाले यस वर्ष तीजकै दिन २१ भदौमा सो प्रतियोगिता गर्न लागेको हो ।

रानीपौवास्थित पुरानोधारा चोकमा हुने प्रतियोगितामा यतिबेला टिम दर्ता गर्ने कार्य भइरहेको प्रचार संयोजक एवं संस्थाका पूर्व अध्यक्ष वसन्तराज कोइरालाले जनाए ।

आयोजकका अनुसार प्रथमले २० हजार, दोस्रोले १५ हजार, तेस्रोले १० हजार नगद पुरस्कार प्राप्त गर्नेछन् । सान्त्वना, उत्कृष्ट भेषभूषा, उत्कृष्ट नृत्य प्रस्तुत गर्नेले जनही ५ हजार साथमा प्रमाणपत्र प्राप्त गर्नेछन् ।

प्रतियोगितामा थप मनोरञ्जन दिन राष्ट्रिय तथा स्थानीय कलाकारसमेतको उपस्थिति रहनेछ ।

कार्यक्रममा वरिष्ठ लोकगायिका हरिदेवी कोइराला, पदमराज ढकाल, जीवन दाहाल, तारापति सुवेदी, नेत्रपाणि बास्तोला, सरला पाण्डे, कमला सुनारले प्रस्तुति दिनेछन् । हास्यकलाकार युवराज भण्डारीले थप मनोरञ्जन दिने छन् ।

प्रचार संयोजक कोइरालाका अनुसार कार्यक्रम सफल पार्न विभिन्न संघसंस्था, व्यवसायी, टोलवासी तथा शुभचिन्तक एवं प्रायोजकबाट आर्थिक एवं नैतिक सहयोग प्राप्त भइरहेको छ ।