पोखरा । सिद्धि सेतुली स्मृति प्रतिष्ठानले पोखराका विभिन्न विद्यालयका विद्यार्थीलाई शैक्षिक सामग्री र छात्रवृत्ति वितरण गरेको छ । प्रतिष्ठानले ‘बालशिक्षा कार्यक्रम’ अन्तर्गत कक्षा १२ सम्मका असहाय तथा जेहेनदार विद्यार्थीलाई शैक्षिक सामग्री तथा छात्रवृत्ति प्रदान गरेको हो ।
पोखराका १० विद्यालयका १ सय ७९ जना विद्यार्थीलाई विद्यालय झोलासहित शैक्षिक सामग्री र नगद छात्रवृत्ति प्रदान गरिएको प्रतिष्ठान अध्यक्ष दीपेन्द्र श्रेष्ठले जानकारी दिए । जसमा कक्षा ११ र १२ मा अध्ययनरत् ४६ विद्यार्थीलाई ६/६ हजार दरले नगद छात्रवृत्ति दिइएको छ । यस्तै, १ सय १८ जनालाई ब्यागसहित शैक्षिक सामग्री र सहारा आधारभूत विद्यालयका १५ जनालाई शैक्षिक सामग्री प्रदान गरिएको अध्यक्ष श्रेष्ठले बताए ।

पोखराका कन्या मावि, बालमन्दिर मावि, नवप्रभात मावि, सिर्जना बहिरा मावि, अमरसिंह मावि, ज्ञानभूमि आधारभूत मावि, महेन्द्र मावि, कुँडहर आधारभूत मावि, सिद्धार्थ आधारभूत मावि र सहारा आधारभूत माविका विद्यार्थी छनोट गरेर सहयोग गरिएको जनाइएको छ ।

प्रतिष्ठानका संस्थापक तथा संरक्षक विश्व शाक्यले प्रतिष्ठानले आर्थिक अवस्था कमजोर भएका तथा जेहेनदार विद्यार्थीलाई सहयोग गर्दै आएको बताए । शिक्षाको पहुँचबाट टाढा रहेका तथा आर्थिक अभावकै कारण पढाइ छोड्नपर्ने अवस्था भएका विद्यार्थीलाई सामाजिक संस्थाले निभाउनुपर्ने दायित्व पूरा गर्ने उनको प्रतिबद्धता थियो ।

कार्यक्रममा प्रतिष्ठानका मानार्थ सम्मानित सदस्य डा. अनिल सुवेदीले छात्रवृत्ति पाउने ठूलो कुरा नभइ, सदुपयोग गर्न सक्नु ठूलो हो भने । छात्रवृत्ति पाउने विद्यार्थी अरुभन्दा अब्बल र सक्षम हुनुपर्ने र उनीहरुबाट अरुले सिक्नुपर्ने उनको भनाइ थियो । विद्यार्थीको पढाइलेखाइ विद्यार्थीमा मात्र भर नपर्ने भएकाले अभिभावक र शिक्षक पनि चनाखो हुनुपर्ने उनले बताए ।

संस्थाका पूर्व अध्यक्ष एवं संरक्षक सदस्य नरेन्द्रमान लालचनले सिद्धि सेतुली स्मृति प्रतिष्ठान समाजसेवामा पूर्णरुपमा समर्पित संस्था भएको बताए । प्रतिष्ठानका सहयोगी संरक्षक क्या. मनबहादुर गुरुङले विद्यार्थीको शैक्षिक गुणस्तर बढाउन छात्रवृत्ति प्रदान गरिएको बताए । छात्रवृत्तिको सक्दो सदुपयोग गर्न उनको सुझाव थियो । पोखरा–९ का वडाध्यक्ष दीपेन्द्र मर्सानीले प्रतिष्ठानको बृहत् कार्यमा वडाले सहयोग गर्ने बताए ।

बाल मन्दिर माविका प्रधानाध्यापक सुशील बस्नेतले छात्रवृत्तिले विद्यार्थीको शैक्षिक विकासमा सहयोग, प्रेरणा र हौसला मिल्ने बताए । कार्यक्रममा कन्या क्याम्पसकी विद्यार्थी यसोदा पुर्जा पुन र सिर्जना बहिराका यमुना खत्रीले छात्रवृत्तिले पढाइमा सहयोग गर्ने बताएकी थिइन् ।
प्रतिष्ठान अध्यक्ष दीपेन्द्र श्रेष्ठको अध्यक्षतामा भएको कार्यक्रममा उपाध्यक्ष प्रमिला तझ्याले स्वागत र सचिव इन्द्रकमल मानन्धरले सञ्चालन गरेकी थिइन् ।