पोखरा । सञ्चार तथा सूचना प्रविधिमन्त्री पृथ्वी सुब्बा गुरुङले अहिलेको गठबन्धन आगामी ८४ को चुनावसम्मै टिक्ने दाबी गरेका छन् । ‘कही नभएको जात्रा हाडीगाउँमा’ अहिले गण्डकीमा भएको भन्दै उनले टिप्पणीसमेत गरे ।

प्रेस चौतारी नेपाल गण्डकीले शनिबार आयोजना गरेको पत्रकार सम्मेलनमा संघीय सरकारका प्रवक्ता समेत रहेका उनले अहिलेको गठबन्धन ८४ को चुनावसम्मै जाने दाबी गरेका हुन् । परराष्ट्र मन्त्री आरजु देउवाको भारत भ्रमणलाई लिएर सरकारको आयु छोट्इँदै गएको भन्ने टिप्पणी आइरहँदा उनले सम्बन्ध सुधारका लागि थियो भन्ने कुरा कसैले ध्यान नदिएको बताए । उनले ‘म्याजिक नम्बर’ भएको पार्टीले दुई ठूला दललाई पटक–पटक धोका दिएकोले अब यो सरकार चुनावसम्म जाने जिकिर गरे । नेपालको पत्रकारिताको कमजोरी भनेको अलि बढी नेगेटिभ समेत रहेको टिप्पणी गरे ।

‘टिआरसी विधेयक आउनु ‘माइल स्टोल’ हो,’ उनले भने, ‘२०६२÷०६३ देखि अल्झिएको यो समस्या समाधान भयो । सरकार टिक्ने आधार पनि हो ।’ उनले धेरै प्रदेशमा आवश्यक कानुन बनाउन क्याबिनेटमा आफूले आवाज उठाउने मन्त्री गुरुङले बताए । संघीय निजामती ऐन, संघीय प्रहरी ऐन ल्याउन अवरोध भए पनि छिट्टै ल्याउने उनले बताए ।

यस्तै, एमाले–कांग्रेसबीच सत्तासमीकरणको मर्म गण्डकीले पालना नगरेको विषयमा उनले टिप्पणी गरे ।

उनले केन्द्रमा जे समीकरण बन्यो, तल पनि त्यही समीकरण हुनुपर्ने सहमति बमोजिम गण्डकीमा कांग्रेस नेतृत्वको सरकारले त्यो पालना नगरेको बताए । उनले भने, ‘मलाई दुःखको बेलामा साथ दिएको भन्नु गलत हो । यो निजी प्रणाली हो र ? कम्पनी चलाएको हो र ?’

संघीय सरकारमा कांग्रेसको समर्थनमा एमाले अध्यक्ष केपी शर्मा ओली अहिल प्रधानमन्त्री छन् । गत १७ असारको मध्यरातिमा ओली–देउवाबीच सहमतिमा ओली ३० असारमा प्रधानमन्त्री नियुक्त भएका थिए । तर, गण्डकीमा एमाले सरकारमा गइसकेको छैन ।

एमाले संसदीय दलका नेता खगराज अधिकारी र कांग्रेस संसदीय दलका नेता एवं मुख्यमन्त्री सुरेन्द्रराज पाण्डेबीच ९ मन्त्रालय बनाउने सहमति भएको विषय बाहिरिँदा कांग्रेसको भागमा परेका ५ मन्त्रालयबाटै समाजवादीका फणीन्द्र देवकोटा र स्वतन्त्र सांसद दीपक मनाङेको मन्त्री पद जोगाइराख्ने खेलमा कांग्रेस लागिपरेको छ । सोही विषयमा गण्डकी सरकारका संस्थापक मुख्यमन्त्री समेत रहेका गुरुङले गण्डकीको यो अभ्यास ‘राजनीतिक रुपमा गलत’ भएको बताएका हुन् ।

सञ्चारमन्त्री गुरुङले सामाजिक सञ्जाल सञ्चालन, प्रयोग र नियमनबारेको विधेयक, दुरसञ्चारसम्बन्धी विधेयक एक सय दिनभित्र क्याबिनेटमा लैजाने र एआई चलाउनेसम्बन्धी कानुन ल्याउने जनाए ।

नेपालको सरकारी सञ्चारमाध्यम राजा महेन्द्रको पालाको ऐन संशोधनको आवश्यकता रहेको उनले औंल्याए । कार्यक्रम प्रेस चौतारी नेपाल गण्डकी अध्यक्ष इन्द्रप्रसाद पौडेलको अध्यक्षतामा भएको थियो भने संचालन महासचिव आश गुरुङले गरे ।