पोखरा । राष्ट्रिय प्रजातन्त्र पार्टी कास्कीको आह्वानमा शनिबारदेखि पोखरामा मठमन्दिर तथा धार्मिकस्थलको सरसफाइ अभियान सुरु भएकाे छ । पछिल्लो समय धार्मिक आस्थाको केन्द्रहरुमा उचित सरसफाइ नपुगेको र  आफूहरुको सामाजिक उत्तरदायित्वअन्तर्गत सरसफाइ सुरु गरिएको राप्रपा कास्की प्रवक्ता अरुण गिरीले बताए ।

यसैक्रममा शनिबार राप्रपा वडा कार्यसमिति पोखरा ८ को आयोजनामा वडास्थित पशुपतिनाथ मन्दिर सिमलचौरको सरसफाइ गरिएको छ । आगामी दिनमा पोखराका ३३ वटै वडाहरुले सम्बन्धित वडामा पर्ने मठमन्दिर तथा धार्मिकस्थलको सरसफाइ गर्नेछन् ।

कार्यक्रममा राप्रपा केन्द्रीय सदस्यद्वय शंकर खराल र शिव चालिसे, राप्रपा कास्की अध्यक्ष नारायण गुरुङ, प्रवक्ता अरुण गिरी, पार्टीका वडा ८ का अध्यक्ष बाबुराम चालिसे लगायतको सहभागिता थियो ।