पोखरा, १४ भदौ । महिला सामुदायिक स्वास्थ्य स्वयंसेविकाको पहिलो साधारण सभा तथा हरितालिका तीज विशेष एवं सम्मान कार्यक्रम भएको छ ।

कार्यक्रम उद्घाटन गर्दै पोखरा महानगरपालिकाका मेयर धनराज आचार्यले राज्यको सीमित सुविधाका बाबजुद आफ्नो अमूल्य समय र योगदान समुदायका लागि समर्पित भएर महिला स्वस्थ्य स्वयंसेविकाले गरेको कार्य अन्तर्राष्ट्रियस्तरमै उदाहरणीय रहेको बताए ।

महानगरका स्वस्थ्य स्वयंसेविकाको हकहितका लागि सधैँ साथमा रहेको उनले बताए । उनले गत वर्षदेखि ६० वर्ष पुगेर स्वस्थ्य स्वयंसेवाबाट बिदाइ हुने स्वास्थ्य स्वयंसेविकालाई महानगरले एकमुष्ठ ५० हजार दिने गरेको बताए । बिदाइ हुनेमा पोखरा २१ का हरिमाया लामिछाने, सीतादेवी अधिकारी, पोखरा ३१ की वसन्ती पौडेल, पोखरा १८ की रत्नदेवी जिसी, पोखरा २८ की सीतादेवी पौडेल र पोखरा २५ की भगवती बास्तोला छन् ।

कार्यक्रममा पोखरा २ का अध्यक्ष दिवसमान प्रधानांग, पोखरा ४ वडा अध्यक्ष देवकृष्ण पराजुली, पोखरा १७ का वडा अध्यक्ष राधिका शाही योगीलगायत बोलेका थिए ।

महिला सामुदायिक स्वास्थ्य स्वयंसेविका कास्कीका अध्यक्ष भीमा पौडेलले अध्यक्षको प्रतिवेदन प्रस्तुत गर्दै समुदायमा स्वस्थ्य स्वयंसेविकाले नियमित खोप कार्यक्रमबाहेक थुपै्र स्वास्थ्य सचेतनामूलक कार्यक्रम गर्दै आएको बताइन् । उनको अध्यक्षतामा भएको कार्यक्रममा स्वागत उपाध्यक्ष संगीता बराल र संचालन सचिव गीता भण्डारीले गरेका थिए ।

पोखरा महानगरका ३३ वटा वडामा हाल ६ सय ५६ जना स्वस्थ्य स्वयंसेविका छन् ।