नवलपुर । विनयीत्रिवेणी गाउँपालिका ७, रानीनगरमा निर्माणाधीन सेफ्टी टंयाकीमा निसासिएर शुक्रबार ३ जनाको मृत्यु भएको छ ।

जिल्ला प्रहरी कार्यालय, नवलपुरका प्रहरी नायव उपरीक्षक वेदबहादुर पौडेलका अनुसार रानीनगरमा भोलासिंह क्षेत्रको निर्माणाधीन घरको ट्वाइलेटको सेफ्टी टंकीभित्र काम गर्ने क्रममा उनीहरु अचानक बेहोस भएका थिए । घटनामा घरधनी भोलासिंह क्षेत्रीका छोरा ३८ वर्षीय प्रकाशसिंह क्षत्री, विनयीत्रिवेणी ७ निवासी शिव बोगटीका १९ वर्षीय छोरा गणेश बोगटी र बर्दघाट नगरपालिका ७ निवासी २८ वर्षीय मोहम्मद राजाको मृत्यु भएको हो ।

सेफ्टी टंकीमा बेहोस भएका उनीहरुलाई अस्पताल लगिएकोमा प्रकाश सिंहको परासीस्थित जिल्ला अस्पताल, पृथ्वीचन्द्र अस्पतालमा, बोगटी र मोहम्मद राजाको भीम अस्पताल, भैरहवामा निधन भएको हो ।

मोहम्मद राजा मजदुर हुन् । उनी बेहोस भएर प्रकाशसिंह क्षत्री बचाउन गएका थिए । गणेश छिमेकी हुन् ।