पोखरा । इन्टरस्कुल व्याण्ड कम्पिटिसनमा फाइनल राउण्डमा १० वटा स्कुल व्याण्ड छनाट भए ।

पोखरा सांगीतिक कलाकार संघ आयोजना तथा पोखरा महानगरपालिका र गण्डकी प्रज्ञा प्रतिष्ठान सहकार्यमा शुक्रबारदेखि सुरु प्रतियोगिताको पहिलो दिन छनोट ती व्याण्डले उपाधिका लागि शनिबार ११ बजेदेखि प्रस्तुति राख्नेछन् ।

सगरमाथा मावि, प्रतिभा मावि, गुरुकुल विद्याश्रम, ग्लोवल कलेजियट, कुमुदिनी होम्स मावि, गण्डकी बोर्डिङ स्कुल, मदरल्याण्ड बोर्डिङ स्कुल (बि), फिस्टेल एकेडेमी, कालिका मावि र लाभिन्स रेसिडेन्सियल स्कुल छनोट भएको पोखरा सांगीतिक कलाकार संघका सचिव भाष्करध्वज श्रेष्ठले जानकारी दिए ।

प्रतिस्पर्धी ब्याण्डले गण्डकी प्रदेशका सर्जकको गीत गुञ्जाउँदा पोखरा सभागृहमा दर्शकले समर्थनमा हुटिङ गरेका थिए ।

फाइनल प्रतिस्पर्धामा २/२ वटा गीत प्रस्तुत गर्नुपर्नेछ । उनीहरुले १ गीत आफ्नो मौलिक र अर्को गण्डकी प्रदेशका सर्जकको गीत प्रस्तुत गर्नुपर्ने संघ अध्यक्ष हर्कराज गुरुङ (भाइ) गुरुङले बताए । सोही आधारमा हुने नतिजामा विजेताले १ लाख र उपविजेताले ५० हजार प्राप्त गर्नेछ । तेस्रोले २५ हजारसहित प्रमाणपत्र प्राप्त गर्नेछ । उत्कृष्ट भोकल, लिड गिटार, बेस गिटा, उत्कृष्ट ड्रमर, पव्लिक च्वाइस र जज च्वाइसले ५÷५ हजारसहित प्रमाणपत्र प्राप्न गर्नेछन् ।

‘शिक्षासँगै संगीत’ भन्ने मूलनारा साथ आयोजित प्रतियोगिताको गण्डकी प्रज्ञा प्रतिष्ठान उपकुलपति गोरे गुरुङले उद्घाटन गरे । उनले यो प्रतियोगिताले पोखराको संगीतको विकासमा सघाउ पुग्ने बताए ।
तल्लो तहदेखि नै कला र संगीतका प्रतिभा खोज्ने उद्देश्यले प्रतियोगिता आयोजना गरिएको आयोजकको भनाइ छ ।

संघ सचिव भाष्करध्वज श्रेष्ठले नब्बेको दशकमा पोखरा ‘व्याण्डहरुको राजधानी’ भनेर चिनिएको भन्दै पुरानो विरासत फर्काउन प्रतियोगिता कोशेढुंगा सावित हुने विश्वास व्यक्त गरे ।