पोखरा । मोहन मैनालीको ‘मुकाम रणमैदान’ कृतिले २०८० सालको मदन पुरस्कार पाएको छ ।

मदन पुरस्कार गुठीको शुक्रबार बसेको साधारणसभा बैठकले ‘मुकाम रणमैदान’ कृतिका लागि मैनालीलाई पुरस्कार दिने निर्णय भएको गुठीका अध्यक्ष कुन्द दीक्षितले जनाए ।

यसैगरी भाषाविद् प्राडा योगेन्द्रप्रसाद यादवलाई जगदम्बाश्री पुरस्कार प्रदान गर्ने निर्णय बैठकले गरेको छ । दुवै पुरस्कारको राशि चार–चार लाख रुपैयाँ छ ।

गुठीले मदन पुरस्कारका लागि यसअघि पाँच पुस्तकको नाम सार्वजनिक गरेको थियो । तीमध्ये भक्त स्याङतानको डम्फुको आत्मालाप (कथासंग्रह), जीवन क्षेत्रीको नुनतेल (गैरआख्यान), भावेश भुमरी र प्रणिता चामलिङको भावलिपि (प्रेमपत्र संग्रह) र रोशन थापा ‘नीरव’ को सन्त्रासका साठी दिन (उपन्यास) पनि परेका थिए । गुठीले यस वर्ष ३०४ वटा कृति प्राप्त भएकोमा पाँच कृति छनोट गरेको थियो ।

२०१२ मा स्थापित मदन पुरस्कार गुठीले पहिलोपल्ट २०१३ सालमा गद्य विधामा सत्यमोहन जोशीको ‘हाम्रो लोक संस्कृति’, सामाजिक शास्त्रमा चित्तरञ्जन नेपालीको ‘जनरल भीमसेन थापा र तत्कालीन नेपाल’ तथा विज्ञान विधामा बलराम जोशीको ‘अधिकविभव स्थिरविद्युत् उत्पादक’ कृतिलाई मदन पुरस्कार अर्पण गरेको थियो ।

जगदम्बाश्री पुरस्कार २०४५ सालदेखि दिन थालिएको हो। पहिलोपटक उक्त पुरस्कार नारायण गोपाललाई प्रदान गरिएको थियो ।