पोखरा । पोखरा उद्योग वाणिज्य संघको नयाँ नेतृत्वका लागि चुवानी मैदानमा होमिएको अर्जुन पोखरेल प्यानल यतिबेला घरदैलोमा व्यस्त छ । १५ बुँदे प्रतिबद्धतापत्रसहित टोलीले घरदैलो गर्दै मतदातासँग भोट मागिरहेको छ ।

विन्ध्यवासिनी मन्दिर दर्शन गरी घरदैलो सुरु गरेको टोलीले लामाचौरदेखि छोरेपाटनसम्मका व्यवसायीको पीरमर्कालाई सुनेर सम्बोधन गर्न प्रत्यत्न गर्ने प्रतिबद्धता व्यक्त गरेको जनाएको छ ।

संघको छवि उचाइमा पु¥याउन आफूहरुको जीत सुनिश्चित भएको पोखरेल प्यानलको दाबी छ ।

‘सम्मानित संघ, समुन्नत व्यवसाय’ नारा आत्मसात् गर्दै संघलाई आमपोखरेलीको साझा घरको रुपमा विकास गर्ने संकल्प अध्यक्षका प्रत्यासी पोखरेलको छ । आफू निर्वाचित भए साना, मझौला र ठूला व्यावसायीहरुको समस्यामा साथै रहने पोखरेलले उल्लेख गरेका छन् ।

उनको प्यानलबाट वरिष्ठ उपाध्यक्षमा उत्तममान बुद्धाचार्य, उपाध्यक्ष (उद्योग) मा दिनेशचन्द्र बास्तोला, उपाध्यक्ष (वाणिज्य) मा बलराम आचार्य, महासचिवमा शोभा गौतम, कोषाध्यक्षमा मनोजकुमार श्रेष्ठ, उपमहासचिवमा बालकृष्ण कोइरालाले उम्मेदवारी घोषणा गरेका छन् ।

यस्तै, कार्यसमिति सदस्यमा भीम गौतम, जीवन प्रकाश श्रेष्ठ, प्रेमप्रसाद सुवेदी, सौगात थापा, लेखनाथ सुवेदी, देवेन्द्र प्रजु, टीकाराम सुवेदी (माधव), ललितबहादुर कुँवर, दुधमान (आशीष) गुरुङ, यादवप्रसाद पोखरेल रहेका छन् ।

यही २८ र २९ भदौमा हुने ३५ औं महाधिवेशनबाट आगामी २ वर्षेकार्यकालका लागि नयाँ नेतृत्व निर्वाचित हुनेछ ।
उता, अध्यक्ष पदका लागि हालका वरिष्ठ उपाध्यक्ष गोकर्ण कार्कीले पनि उम्मेदवारी घोषणा गरिसकेका छन् ।