पोखरा । पोखरा–९, बसपार्कस्थित सहारा बाल आधारभूत विद्यालयमा नेलम्बो नेपालको प्राविधिक सहयोगमा मंगलबारदेखि निःशुल्क दन्त शिविर सुरु भएको छ । ‘स्वस्थ दाँत स्वस्थ जीवन’ नाराका साथ ४ दिनसम्म संचालन हुने शिविरमा पोखरा ९ स्थित सहरी स्वास्थ्य केन्द्रको समन्वय छ ।

शिविर उद्घाटन गर्दै पोखरा ९ का वडाध्यक्ष दीपेन्द्र मर्सानीले विपन्न लक्षित कार्यक्रममा वडा तथा नेलम्बोबीच तादाम्यता मिलेको स्पष्ट पार्दै आगामी दिनमा नेलम्बोसँग सहकार्य गर्दै जाने बताए । उनले अव्यवस्थित क्षेत्रका विपन्न बालबालिका लक्षित गरी शिविर संचालन गरेकोमा नेलम्बोप्रति आभार प्रकट गरे ।

नेलम्बो अध्यक्ष एकदेव देवकोटाले शिविरमा दाँतसम्बन्धी सम्पूर्ण उपचार निःशुल्क गरिने बताए । उनले संस्थाले स्वास्थ्य, शिक्षा, वातावरण र अनुसन्धानको क्षेत्रमा कार्य गरिरहेको औंल्याए । सक्रिय सहभागिता भएको ठाउँमा संस्थाले सहकार्य गर्ने उल्लेख गर्दै अध्यक्ष देवकोटाले स्वास्थ्यप्रति सजग रहन सबैसँग आग्रह गरे ।

विद्यालय अध्यक्ष विक्रम थकालीले विद्यालयको स्तरवृद्धिका लागि विभिन्न संघसंस्थासँग सहकार्य भइरहेको जनाउँदै शैक्षिक प्रगति पनि सन्तोषजनक रहेको सुनाए ।

विद्यालय प्रधानाध्यापक लोचना अधिकारीले विद्यालयको पृष्ठभूमि स्मरण गर्दै सरोकारवालाको सद्प्रयासबाट विद्यालय हालको अवस्थामा आएको स्पष्ट पारिन् । उनले दाँत स्वास्थ्यले मानव स्वास्थ्यका साथै सौन्दर्यता पनि टेवा पुग्ने जनाइन् ।

सहारा क्लब पोखराका अध्यक्ष केशवराज बराल तथा नागढुंगा टोल विकास संस्थाका सचिव समेत रहेका विद्यालयका सल्लाहकार विष्णुप्रसाद सुवेदी लगायतले शिविरको महत्वमाथि प्रकाश पारेका थिए ।

शिविरमा डा. दीक्षा क्षत्रीको नेतृत्वमा दन्त चिकित्सक सहायक अञ्जु विक, प्राविधिकहरु रुपेश गुरुङ, ऋतिक चुवार्इं, मुक्तबहादुर माल तथा नेलम्बोमा कार्यक्रम संयोजक भीमप्रसाद भण्डारी खटिएका छन् ।

कार्यक्रममा जनप्रतिनिधि नन्दराम गिरी, अक्षयकोषदाताहरु, निलम्बो नेपालका प्रतिनिधिहरु, शिक्षक, अभिभावक, विद्यार्थी, सहारा हङकङका प्रतिनिधि, विभिन्न टोल विकास र आमा समूहका प्रतिनिधिहरु, सहारा क्लबका पूर्व अध्यक्षहरु लगायतको उपस्थिति थियो ।

विद्यालय व्यवस्थापन समिति विक्रम अध्यक्ष थकालीको अध्यक्षतामा भएको उक्त कार्यक्रममा प्रधानाध्यापक अधिकारीले स्वागत तथा शिक्षक सुदीप कोइरालाले कार्यक्रम संचालन गरे ।
कक्षा नर्सरीदेखि ८ सम्म संचालित उक्त विद्यालयमा हाल २ सय ५० विद्यार्थी अध्ययरत छन् ।