पोखरा । म्याग्दीमा सोमबार साँझ बस दुर्घटना हुँदा ४ जना घाइते भएका छन् ।

सदरमुकाम बेनीबाट गलेश्वरतर्फ जाँदै गरेको ना ५ ख २८९८ नम्बरको यात्रुवाहक बस बेनी–जोमसोम–कोरला सडकखण्डअन्तर्गत बेनी–६ गलेश्वर नजिकै ठूलोबौरमा साढे ५ बजे दुर्घटना भएको हो ।

जिल्ला प्रहरी कार्यालय, म्याग्दीका प्रहरी निरीक्षक राजन रायमाझीका अनुसार दुर्घटनामा बसचालक रघुगंगा गाउँपालिका–१, तिप्ल्याङका ३० वर्षीय रमेश खड्का, सहचालक २८ वर्षीय धनकुमार बुढा, तिप्ल्याङका २८ वर्षीय रोशन पुर्जा र रघुगंगा गाउँपालिका–३, पिप्लेका २९ वर्षीय भूमिराज रानामगर घाइते भएका हुन् ।

घाइतेको बेनी अस्पतालमा उपचार भइरहेको प्रहरीले जनाएको छ । उनीहरुको टाउको, हात, खुट्टा लगायत शरीरका विभिन्न ठाउँमा चोट लागेको छ । तीमध्ये रोशन गम्भीर घाइते छन् । चालक रमेश र भुमिराजको अवस्था मध्यम छ । सहचालक धनकुमारको स्वास्थ्य अवस्था सामान्य छ ।

बस सडक छेउमा ठोक्किएर सडकमै पल्टिएर दुर्घटना भएको हो ।