पोखरा । ग्रिन डेभलपमेन्ट बैंकको १२ औं वार्षिकोत्सव अवसरमा बैंक र लायन्स क्लब अफ पोखरा भद्रकाली आयोजनामा आइतबार रक्तदान कार्यक्रम भएको छ । न्युरोडस्थित बैंक परिसरमा भएको कार्यक्रममा ४७ युनिट रगत संकलन भयो ।

लायन्स इन्टरनेसनल डिस्ट्रिक्ट ३२५ एलका गभर्नर सुमन भट्ट क्षत्रीले बैंकका प्रमुख कार्यकारी अधिकृत हरिबहादुर बुढाथोकीलाई ब्लड ब्याग हस्तान्तरण गरी कार्यक्रम उद्घाटन गरेका थिए । प्रमुख कार्यकारी अधिकृत बुढाथोकीले रक्तदान सबैभन्दा ठूलो मानवीय कार्य रहेको भन्दै यसलाई निरन्तरता दिइँदैआएको बताए ।

नेपाल रेडक्रस सोसाइटीअन्तर्गत ब्लड बैंक पोखरासँगको सहकार्यमा रक्तदान कार्यक्रम भएको हो ।

बैंकका सहायक महाप्रबन्धक संयुक्तबहादुर धाख्वाले वार्षिकोत्सव अवसरमा बैंकका विभिन्न शाखाहरुबाट सामाजिक कार्यहरु गरिएको जानकारी दिए । बागलुङ शाखाले मानव सेवा आश्रममा दान गरेको छ भने दलदले शाखाले विद्यालयमा शैक्षिक सामग्री वितरण गरेको छ । दमौली लगायका शाखाबाट सरसफाइका लागि डस्टबिन वितरण गरियो ।

यसैबीच, वार्षिकोत्सव अवसरमा बैंकले ‘ग्रिन समृद्धि बचत खाता’ सञ्चालनमा ल्याएको छ ।

बागलुङमा १२ वर्ष अगाडि खुलेको बैंकको मुख्य कार्यालय हाल पोखरा न्यूरोडमा छ । ५ जिल्ला कार्यक्षेत्र रहेको बैंकका १५ शाखा छन् ।