पोखरा । फर्निचर तथा फर्निसिङ व्यवसायी संघ कास्कीमा थोमप्रसाद अर्याल निर्वाचित भएका छन् ।

संघको शनिबार वार्षिक साधारण सभा एवं १२ औं अधिवेशनले पोखराको जरेवरस्थित सौगात सःमिल एण्ड फर्निचर उद्योगका सञ्चालक अर्यालको अध्यक्षतामा १८ सदस्यीय नयाँ कार्यसमिति सर्वसम्मत निर्वाचित गरेको हो । पाल्पा स्थायी घर भएका अर्याल संघमा यसअघि वरिष्ठ उपाध्यक्ष थिए ।

कार्यसमितिको वरिष्ठ उपाध्यक्षमा रामजी तिवारी, प्रथम उपाध्यक्ष बेलबहादुर नेपाली (रुद्र), द्वितीय उपाध्यक्ष योगा गौतम चौलागाई, तृतीय उपाध्यक्ष एकनारायण गौतम, महासचिव परमेश्वर दवाडी, सचिव रमेश विश्वकर्मा र कोषाध्यक्ष राजेन्द्र पण्डित छन् ।

एसोसिएट सदस्यमा प्रकाश बोगटी, सदस्यमा विष्णु केसी अधिकारी, होमबहादुर थापामगर, अमृतबहादुर कार्की, भेषराज बास्तोला, नवराज सुवेदी, अमृता कार्की लामिछाने, सुमनकुमार श्रेष्ठ छन् ।

क्षेत्रीय सदस्यमा कवीन्द्र पुन र विकास ओझा निर्वाचित भएको प्रमुख निर्वाचन अधिकृत ज्ञानबहादुर नेपालीले जनाए । कार्यसमितिको कार्यकाल २ वर्षको हुनेछ ।

साधारणसभाको प्रमुख अतिथि नेकपा (एमाले) स्थायी कमिटी सदस्य तथा गण्डकी प्रदेशका पूर्वमुख्यमन्त्री खगराज अधिकारीले उद्घाटन गरेका थिए । उनले व्यवसायमा गुणस्तरका लागि स्वच्छ प्रतिष्पर्धा हुनुपर्नेमा जोड दिए । ‘व्यवसायमा गुणस्तरका लागि स्वच्छ प्रतिष्पर्धा हुनुपर्छ, अस्वस्थ प्रतिष्पर्धा गर्नुहुँदैन’ उनले भने ।

स्वदेशी उत्पादनको उपयोगमा जोड दिएका उनले त्यसको प्रयोग गर्नको लागि ऐन नियमावली मार्फत परेका समस्या फुकाउन सहजीकरण गर्ने प्रतिवद्धता जनाए ।

‘हाम्रो उत्पादन हामी उपयोग गरौँ र हामीले वन ऐन नियमावली संशोधन गर्नुपर्ने विषयहरूलाई राम्रोसँग तपाईहरूले प्रष्ट पार्नुहोस्,’ उनले भने ।

धराशायी हुँदै गरेको व्यवसायको क्षेत्रमा नयाँ सरकारको गठन पश्चात सुधारका केही संकेत देखिन थालेको उनको दाबी थियो । नेप्सेमा भएको वृद्धि त्यसको एउटा उदाहरण भएको बताएका उनले निष्कृय पैसालाई सक्रिय बनाउनुपर्ने बताए । फर्निचर तथा फर्निसिङमा आत्मनिर्भर बनाउनको लागि उनले व्यवसायीसँग आग्रह गरे ।