पोखरा । सुप्रसिद्ध कवि एवं भाषाविद् मुकुन्दशरण उपाध्यायले साहित्यकारले तयार गरेका कृति प्रकाशित नहुँदा समाजलाई ठूलो नोक्सान पुग्ने बताएका छन् ।

उनले भने, ‘कृति अध्ययनबाट लाभ प्राप्त हुन्थ्यो, त्यसबाट वञ्चित हुनु समाजका लागि ठूलो नोक्सानी हो ।’

छन्दनायक माधव वियोगीको कवितात्मक कथा संग्रह ‘फेवामा तैरिएको सिन्दूर’ को लोकार्पण गर्दै प्रमुख अतिथि उपाध्यायले निरन्तर क्रियाशील रहेर कृति प्रकाशमा ल्याइरहनु कवि वियोगीको प्रेरणादायी कार्य भएको उल्लेख गरे ।

कृति समीक्षा गर्दै डा. जगन्नाथ रेग्मीले नेपालीमा गद्यमा लेखिने कथा विधालाई छन्दमा लेखेर वियोगीले नवीन प्रयोग गरेको बताए ।

प्राडा कुुसुमाकर न्यौपानेले सर्जकले कलम चलाउँदा देशमा हलचल ल्याउन सक्नुपर्ने धारणा राखे ।

कृतिकार वियोगीले एक सातामै उक्त कृति तयार पारेको बताए । उनले विचार फु¥यो भने पुस्तक लेख्न समय नलाग्ने धारणा राखे । ‘फेवामा तैरिएको सिन्दूर’ मा विभिन्न छन्दमा लेखिएका ५ कथा संग्रहित छन् ।

त्यस अवसरमा जिज्ञासु सापकोटा, शुभ शर्मा, अव्यग्र अस्मित, आर्या त्रिपाठी र तारानाथ पराजुलीले लोकार्पित कृतिभित्रको कथा लयबद्धरुपमा वाचन गरे ।

माधव वियोगी वाङ्मय प्रतिष्ठान अध्यक्ष नवराज बरालको अध्यक्षतामा भएको कार्यक्रममा उपाध्यक्ष छन्दमणि त्रिपाठीले स्वागत तथा सहसचिव शिव त्रिपाठीले सञ्चालन गरेका थिए ।