पोखरा । नेपाल रेडक्रस सोसाइटी, पोखरा–१९ उपशाखाको आयोजना तथा नेलम्बो नेपालको प्राविधिक सहयोगमा भारती भवन मावि, पुरुन्चौरमा निःशुल्क दन्त शिविर भएको छ । शिविरमा ४ सय ८१ जनाको दाँत परीक्षण गरिएको छ ।
२ चरण गरी ८ दिनसम्म भएको शिविरमा वडा कार्यालय, विद्यालय तथा नेपाल रेडक्रस सोसाइटी जिल्लाको सहकार्य रहेको थियो ।

बिहीबार शिविर समापन गर्दै वडाध्यक्ष पुष्पेन्द्र पाण्डेले शिविर फलदायी भएको बताए । उनले नेलम्बोले विशिष्ट मानव कल्याणकारी सेवा गरिरहेको जनाए । महानगर भएर पनि पोखरा १९ को अधिकांश भूगोल ग्रामीण रहेको भन्दै उनले आगामी दिनमा नेलम्बोसँग सहकार्य गर्दै जाने प्रतिबद्धता जनाए । उनले अब वडामा ज्येष्ठ नागरिक लक्षित स्वास्थ्य कार्यक्रम गर्नुपर्ने औंल्याए ।

नेलम्बोका कार्यक्रम संयोजक भीमप्रसाद भण्डारीले शिक्षा क्षेत्रका सरोकार लक्षित गरी शिविर संचालन गरिएको स्पष्ट पार्दै रेडक्रससँग सहकार्य गर्न पाएकोमा खुशी व्यक्त गरे । उनले त्यहाँ ११ लाख ७६ हजार ७ सय रकम बराबरको निःशुल्क सेवा उपलब्ध गराइएको जानकारी दिँदै उपचार गरेको दाँतमा समस्या देखिएमा कार्यालयमा सम्पर्क गरी उपचार गर्न आग्रह गरे ।

उपशाखा सभापति नवराज पौडेलले नेलम्बोले उत्कृष्ट सेवा प्रदान गरेको जनाउँदै अति आवश्यक स्वास्थ्य सेवा प्राप्त गरेकोमा खुशी व्यक्त गरे ।

विद्यालय अध्यक्ष विष्णुप्रसाद अधिकारीले रोगको पहिचानदेखि निदानसम्मका गतिविधि शिविरमा भएको धारणा राखे । आफू नेतृत्वको विद्यालयलाई छनोट गरी सेवा दिएकोमा अधिकारीले आयोजक रेडक्रस उपशाखा तथा नेलम्बोप्रति आभार प्रकट गरे ।

प्रधानाध्यापक नेत्रबहादुर आलेले सेवा नै धर्म भावनाका साथ समयमा खटिएर उपचार प्रदान गरिएको बताए ।

डा. दीक्षा क्षत्रीको नेतृत्वमा ८ स्वास्थ्यकर्मीको टोली खटिएको थियो । शिविरअन्तर्गत कान सुरक्षाबारे पनि सचेतना दिइएको उपशाखाका सल्लाहकार सविन जिसीले जानकारी दिए ।

विद्यालय अध्यक्ष अधिकारीको अध्यक्षतामा भएको समापन समारोहमा प्रधानाध्यापक आलेले स्वागत, कार्यक्रम संयोजक उपशाखाका सहसचिव माधवप्रसाद गौतमले धन्यवाद ज्ञापन र जुनियर रेडक्रस सर्ककका शिक्षक नायक वासुदेव तिवारी र उपशाखा सदस्य रमेश विकले कार्यक्रम संचालन गरे ।