पोखरा । कास्कीको माछापुच्छ्रे गाउँपालिकाले पाठेघरको मुखको क्यान्सर खोज्दै युवतीको स्वास्थ्य परीक्षण गराएको छ । विभिन्न चरणमा किशोरीहरुको चेकजाँच गरी एचपिभी डिएनए गरिएको हो । यसअघि २४ देखि २७ जेठसम्म सबै वडामा एचपिभी परीक्षण गरिएको थियो ।

सुरुमा ४ सय जना महिलाहरुलाई परामर्श गरेर डिएनए लिइएको थियो । १७ असारमा ल्याब टेष्टबाट ८२ जनामा एचपिभी पोजिटिभ रिपोर्ट आएको उपाध्यक्ष सीता अधिकारीले जानकारी दिइन् । उनका अनुसार पोजिटिभ देखिएकालाई थप उपचार र परामर्शका लागि मंगलबार र बुधबार एचपिभी संक्रमण देखिएका ७७ जनालाई भिआइएसहित थर्मो कोगुलेटर विधिबाट परीक्षण गरिएको छ ।

१० जनालाई लिप परीक्षणका लागि काठमाडौं पठाउनुपर्ने अवस्था आएको अधिकारीले बताइन् । ‘पालिकाको हाम्रो टिम महिलाको स्वास्थ्यमा सुधार र घरमै सुत्केरी हुने अवस्थालाई अन्त्य गर्ने अभियानमा छौं,’ उनले भनिन्, ‘त्यसमा नागरिकहरुले पनि साथ र सहयोग दिनुपर्छ ।’

पालिका अध्यक्ष मीनबहादुर गुरुङले एचपिभी परीक्षणबाट जोखिममा रहेका महिला र किशोरीको स्वास्थ्य अवस्थाबारे जानकारी प्राप्त हुने र तत्कालै उपचारमा सहयोग पुग्ने बताए । ‘उनीहरुको उपचारका लागि काठमाडौं जाने र फर्किनेसहित र उपचारको समेत खर्च पालिकाले व्यहोर्ने छ,’ उनले भने ।

कार्यक्रममा क्यान्सर रोग विशेषज्ञ सरिता घिमिरेले महिलालाई रोग निदान र उपचारमा निशुल्क सहयोग प्राप्त भएकोले पालिकालाई धन्यवाद दिइन् । माछापुच्छ«ेले विभिन्न समयमा स्वास्थ्य शिविर आयोजना गर्दै आएको छ ।