पोखरा, ५ भदौ । पोखरामा डेंगु संक्रमण भयावह बन्दै गएपछि लामखुट्टे मार्ने अभियान संचालन गरिने भएको छ । सशस्त्र प्रहरी बल कालिका गण, मालेपाटनले सरोकारवाला निकायको सहभागितामा ७ भदौमा ‘डेंगु सर्च एण्ड डिस्ट्रोय’ अभियान संचालन भएको हो ।

गणका अनुसार उक्त कार्य पहिलो चरणमा पोखरा वडा ५ र ८ का विभिन्न टोलमा संचालन गरिने छ । उक्त दिन बिहान ७ देखि साढे ९ बजेसम्म उक्त कार्य गरिने भएकोले सरोकारवाला निकायलाई सक्रिय सहभागिताका लागि गणले आग्रह गरेको छ ।

एक तथ्यांक अनुसार कास्कीमा हालसम्म ९ सय ३५ जना डुंगु संक्रमित भएको पाइएको छ । तीमध्ये २ जनाले ज्यान गुमाइसकेका छन् ।

पोखराका ३३ वटा वडाहरुमध्ये सबैभन्दा बढी वडा ८ मा डेंगु संक्रमित छन् । वडा ८ मा १ सय ३१, वडा ५ मा १ सय २१ र वडा १७ मा ३३ जना संक्रमित फेला परेको गणले जनाएको छ ।