पोखरा । १८ औं संस्करणको सफल पोखरा अन्तर्राष्ट्रिय म्याराथनबाट पौने ४ लाख रुपैयाँ बचत भएको छ ।

नेपाल भूतपूर्व खेलाडी मञ्च आयोजनामा गत वर्ष फागुनमा भएको म्याराथनमा विभिन्न प्रायोजक र सहयोगीबाट ७५ लाख २४ हजार ७ सय १७ रुपैयाँ आम्दानी भएकोमा खर्च कटाई ३ लाख ७२ हजार ५ सय ७८ रुपैयाँ रकम बचत भएको बुधबार पत्रकार सम्मेलनमा मञ्च अध्यक्ष हरिप्रसाद पराजुलीले बताए । उनका अनुसार अन्तर्राष्ट्रियस्तरको यो प्रतियोगितामा खेलाडीको नाम दर्ताबाट मात्रै ३ लाख ३० हजार ८१ रुपैयाँ जम्मा भएको थियो भने विभिन्न सहयोगीदाताबाट ७१ लाख ९४ हजार ६ सय ३६ रुपैयाँ सहयोग प्राप्त भएको थियो ।

बचत रकम खेलाडी उत्पादनमा लगानी गरिने उनले बताए । ‘हाम्रो कार्यालय सञ्चालन गर्नेदेखि अन्य प्रशासनिक खर्च पनि धेरै छन्,’ उनले भने, ‘त्यो खर्च हामीले उठाएर भए पनि चलाउला भनेर प्रतियोगिताबाट बचत रकम खेलकुदको विकासका निम्ति खर्च गरिनेछ ।’ प्रविधिमा जोड दिएकाले बचत रकम भने जस्तो हुन नपाएको उनले सुनाए ।

मञ्चले १९ औं संस्करणको म्याराथन आगामी ३ फागुनमा आयोजना गर्ने भएको छ । यसपालि १ २१ किमीतर्फ पुरुषको विधा थप गर्ने निर्णय गरेको जनाएको छ । जसअनुसार आगामी संस्करणमा १३ इभेन्टमा म्याराथन हुनेछ ।