पोखरा । नृत्य निर्देशक संघ नेपालको आगामी पुस अन्तिम साता राष्ट्रिय भेला–२०८१ हुने भएको छ । तयारीका लागि पोखरामा संघका विभिन्न प्रदेश अध्यक्ष र सचिवस्तरीय बृहत् प्रारम्भिक छलफलले आगामी २६ र २७ पुसमा कोशीमा प्रथम राष्ट्रिय भेला–२०८१ आयोजना गर्ने निर्णय गरेको संघका सचिव एवं प्रवक्ता ऋषिकेश श्रेष्ठले बताए ।

छलफलमा नृत्य निर्देशक संघ नेपालअन्तर्गत गण्डकीसहित, लुम्बिनी, कोशी, मधेश, बागमती र कर्णाली प्रदेशका अध्यक्ष तथा सचिवको उपस्थिति रहेको संघका सहकोषाध्यक्ष केशव कोइरालाले बताए । साथै, जिल्ला, नगर, गाउँपालिका अध्यक्ष तथा सचिवहरुको उपस्थिति थियो । छलफलमा सबै प्रदेश, जिल्ला, नगरका अध्यक्ष र सचिवहरुले आ–आफ्नो योजना प्रस्तुत गरेको संघका कार्यसमिति सदस्य बुद्ध लामाले बताए ।

संघ गण्डकी प्रदेश व्यवस्थापनमा भएको छलफलको पहिलो सत्र केन्द्रीय अध्यक्ष भुवनदास श्रेष्ठको अध्यक्षता एवं गण्डकी प्रज्ञा प्रतिष्ठानका उपकुलपति गोरे गुरुङको प्रमुख आतिथ्यमा भएको हो । कार्यक्रममा उपकुलपति गुरुङले सम्पूर्ण नृत्य निर्देशकहरुले नृत्यसम्बन्धी अध्ययन र अनुसन्धान गर्दै विद्यार्थीलाई प्रशिक्षण गराउनु पर्ने बताए ।
संघ अध्यक्ष श्रेष्ठले नेपाल सरकार बाट राष्ट्रिय नृत्य दिवस घोषणाका लागि देशैभरका नृत्य निर्देशक एकजुट हुनुपर्ने बताए ।