पोखरा । प्रहरीको सिआईडी हुँ भनी सर्वसाधारणलाई दुखहैरानी दिएको अभियोगमा २ जना युवक फन्दामा परेका छन् । उनीहरुलाई कास्की प्रहरीले पक्राउ गरेको हो ।

पक्राउ पर्नेमा पोखरा १७, छोरेपाटन बस्ने ३२ वर्षीय सन्दीप श्रेष्ठ र सोही ठाउँ निवासी २६ वर्षीय सरोज थापा हुन् ।

गत २७ साउन दिउँसो साढे ३ बजे पोखरा २, बागलुङ बसपार्कस्थित सार्वजनिक स्थानमा २ जना मानिसले हामी सादा पोशाकका प्रहरी (सिआइडी) हुँ भनै सर्वसाधारण नागरिकलाई दुखहैरानी दिँदैै शरीरको खानतलासी गर्नै र पैसा असुल गरेको अभियोग छ । वडा प्रहरी कार्यालय बैदामबाट खटिएको प्रहरी टोलीले उनीहरुलाई पक्राउ गरी सार्वजनिक हित, स्वास्थ्य सुरक्षा, सुविधा र नैतिकताविरुद्धको कसूरअन्तर्गत अभद्र व्यवहार मुद्दामा १० दिनको म्याद थप गरी अनुसन्धान प्रक्रिया अघि बढाएको डिएसपी वसन्तकुमार शर्माले बताए ।