पोखरा । हिल पोइन्ट सेकेन्डरी स्कुल र त्यहाँका १० कक्षाका विद्यार्थीले पोखरा–१५ टुटुङास्थित श्री सिद्ध परोपकार वैदिक गुरुकुल आश्रममा सहयोग गरेका छन् ।

करिब १ लाख ५० हजार रुपैयाँ बराबरको सहयोग प्राप्त भएको आश्रम अध्यक्ष भागवत् पं.भाष्कर कमलनयन गौतमले बताए । कक्षा–१० का विद्यार्थीले आफ्नो खाजा खर्च कटाइ बचत गरेको रकम र स्कुलको सहयोगमा डबल डेकर १० थान, विभिन्न पुस्तक, कापी कलम र खेलकुद सामग्री सहयोग गरिएको हो ।

कार्यक्रममा विद्यालय प्रिन्सिपल दिवाकर जैसीले सामाजिक उत्तरदायित्व अन्तर्गत उक्त कार्यक्रम गरिएको बताए । उनले विद्यार्थीलाई आपसी सहयोगको भावना विकास गर्न यसप्रकारको कार्यक्रमले शिक्षा दिने बताए ।

पण्डित गौतमले सहयोगप्रति आभार व्यक्त गर्दै यस्तै सानो–सानो सहयोगले नै आश्रम चलिरहेको बताए । उनले सरकारले भने खासै सहयोग नगरेको गुनासो गरे ।