पोखरा । नेपाल काभा वुमन्स नेसन्स लिगको फाइनलमा प्रवेश गरेको छ । मंगलबार राष्ट्रिय खेलकुद परिषद्को कभर्ड हलमा भएको खेलमा इरानलाई ३–० को सोझो सेटमा पराजित गर्दै नेपालले भारतसँग भेट सुनिश्चित गरेको हो ।

राउन्ड रोविन लिगमा इरानले नेपाललाई ३–२ सेटले पराजित गरेको थियो । नेपालले त्यसको बदला लिँदै फाइनल यात्रा तय गरेको हो । सेमिफाइनल खेलमा नेपालले इरानलाई २५–२१, २८–२६ र २५–२० मा हराएको हो ।

भारतले अर्को सेमिफाइनलमा श्रीलंकालाई पराजित गरेको थियो । उसले श्रीलंकालाई ३–० को सोझो सेटमा पराजित गर्दै फाइनलमा पुगेको हो । नेपाल र भारतबीचको खेल बुधबार हुनेछ ।

जितपछि नेपाली टोलीका मुख्य प्रशिक्षक जगदीश भट्टले अघिल्ला खेलमा भएका कमी कमजोरीलाई सुधार गर्दै इरानलाई पराजित गर्न सफल भएको बताए । फाइनलमा नेपाल भारतविरुद्ध लिगचरणमा निकालेको जितलाई निरन्तरता दिने उद्देश्यका साथ उत्रनेछ । नेपाली टोलीका मुख्य प्रशिक्षक भट्टले भारतविरुद्ध यसअघिको जितलाई निरन्तरता दिनेमा विश्वास व्यक्त गरे ।

तेस्रो स्थानका लागि इरान र श्रीलंकाबीच प्रतिस्पर्धा हुनेछ ।