बागलुङ, २२ साउन । अविरल वर्षापछि खसेको पहिरोमा पुरिएर बागलुङमा ८ जनाको मृत्यु भएको छ । जिल्ला प्रशासन कार्यालयका अनुसार मृत्यु हुनेमध्ये अधिकांश बालबालिका हुन् ।

मंगलबार बिहान बडिगाड गाउँपालिका–९, बलघाँसमा खसेको पहिरोमा १५ वर्षीय विधान परियार र २४ वर्षीय गंगा बस्नेतको मृत्यु भएको हो । सहायक प्रमुख जिल्ला अधिकारी चित्राङ्गत बरालका अनुसार वडा १०, आरुपाटामा पहिरोले स्थाानीय जोगलाल बुढाको घर र गोठ पुरिंदा ७ वर्षका जुम्ल्याहा मालती बुढा र मधु बुढा, १३ वर्षका मनोज बुढा र १२ वर्षका अमन बुढाको पनि मृत्यु भएको छ ।

सोही घरमा आएकी छिमेकी सञ्जु बिककी ६ वर्षीया छोरीको मृत्यु भएको छ । यस्तै, ५९ वर्षीया मैतीदेवी बिकको पनि मृत्यु भएको हो । घटनामा अझै कति बेपत्ता छन् भन्ने खुलेको छैन ।

पहिरोमा पुरिएकामध्ये ४ जनाको जीवितै उद्धार गरिएको छ । ४६ वर्षीया संगीता बुढा, ५९ वर्षीया सुमित्रा बिक, ३२ वर्षकी सीता थापा र ४२ वर्षीय मंगलसिं बुढा गम्भीर घाइते छन् । उहाँहरूलाई उपचारका लागि प्राथमिक स्थ्यकेन्द्र बुर्तिवाङ पठाउने तयारी भएको छ ।