पोखरा । पोखराको लामाचौरमा यस वर्ष पनि लामाचौर तीज महोत्सव एवं भलिबल प्रतियोगिता हुने भएको छ ।

नवआदर्श सामुदायिक विकास समाजको २८ औं वार्षिकोत्सव अवसरमा २६ औं संस्करणको लामाचौर तीज महोत्सव तथा आमन्त्रित राष्ट्रिय महिला तथा पुरुष भलिबल प्रतियोगिता आगामी १९ देखि २१ भदौसम्म हुने तयारी छ । क्लबको आइतबारको भेलाले मिति तय गर्दै आवश्यक तयारी अघि बढाउने निर्णय गरेको हो । महोत्सव सधैं झैं स्थानीय इन्द्रराज्य लक्ष्मी माविको परिसरमा हुनेछ ।

महोत्सवको मुख्य आकर्षण राष्ट्रिय आमन्त्रित महिला तथा पुरुष भलिबलमा यसपालि दुवैतर्फ ५/५ टिमको सहभागिताका लागि पत्राचार गरिएको समाजका अध्यक्ष स्वागतमानसिंह भण्डारीले बताए । उनका अनुसार पुरुषतर्फ नेपाल पुलिस क्लब, एपिएफ क्लब, त्रिभुवन आर्मी क्लब, गण्डकी प्रदेश र मणिमुकुन्द भलिबल क्लबले भाग लिने तयारी छ । त्यस्तै, महिलातर्फ त्रिभुवन आर्मी, नेपाल पुलिस क्लब, एपिएफ क्लब, न्यू डायमण्ड एकेडेमी र एभरेष्ट भलिबल क्लबलाई निम्तो दिइएको छ ।

लिग कम नकआउटका आधारमा संचालन हुने उक्त प्रतियोगिता भने महोत्सवको अघिल्लो दिन १८ भदौदेखि सुरु हुनेछ ।

महोत्सवमा अन्तरमहिला समूह तीज गीत प्रतियोगिता, अन्तरविद्यालय लोकनृत्य प्रतियोगिता, औद्योगिक तथा विभिन्न व्यापारिक स्टलहरू, विभिन्न सांस्कृतिक कार्यक्रमको साथमा कलाकारको प्रस्तुति हुनेछ । यस्तै, शिक्षा, साहित्य, खेलकुद, युवा उद्यमशीलता विकासका क्षेत्रमा योगदान दिने स्रष्टालाई सम्मान र छात्रवृत्ति कार्यक्रमलाई निरन्तरता दिइने संस्थाका प्रथम उपाध्यक्ष दिनेश भण्डारीले बताए ।

पोखरा १९ का वडा अध्यक्ष पुष्पेन्द्र पाण्डेले अहिले मेला महोत्सव सम्पन्न गर्न धेरै चुनौती रहे तापनि लामाचौर तिज महोत्सव एउटा ब्राण्ड नै बनिसकेकाले सफल पार्न एकजुट भएर लाग्नु पर्ने बताए ।

भेलामा क्लबका कार्यसमिति, सल्लाहकार, पूर्व अध्यक्ष लगायत सम्पूर्ण समिति र उपसमिति संयोजक सहित उपस्थित थिए । सो अवसरमा डा. विश्वयूधीर पौडेल क्षत्री गण्डकी बोर्डिङको प्रिन्सिपल एवं गण्डकी कलेज अफ इन्जिनियरिङ साइन्सको प्राचार्य नियुक्त भएकोमा स्वागतसहित बधाई ज्ञापन गरिएको थियो ।
‘मौलिक संस्कृतिको जगेर्ना गरौं’ भन्ने मूलनाराका साथ संस्थाले २०५४ सालदेखि नै महिलाहरुको महान पर्व तीज अवसरमा ‘लामाचौर तीज महोत्सव’ निरन्तर सञ्चालन गर्दै आएको छ ।