पोखरा । विश्वकै अग्लो दाबी गरिएको मुस्ताङ गल्फ कोर्समा आगामी १ भदौमा तेस्रो संस्करणको प्रतिस्पर्धा हुने भएको छ । ४ हजार ७ सय मिटर उचाइको लोमान्थाङ गाउँपालिका ५, लोवथाङमा प्रतियोगिता गर्न लागिएको सोमबार पत्रकार सम्मेलनमा मुस्ताङ गल्फ कोर्सका निर्देशक इन्द्रधारा विष्टले जानकारी दिए । उनका अनुसार यो वर्ष झण्डै ६० एम्योचर गल्फरले सहभागिता जनाउँदै छन् ।

‘सधैँ नेपाली गल्फर मात्रै हुन्थे । यो वर्षदेखि प्रतियोगितालाई अन्तर्राष्ट्रियस्तरमा बिस्तार गरिएको छ,’ उनले भने, ‘भारत र अमेरिकाबाट गैरआवासीय नेपालीहरु सहभागी हुनेछन् ।’ मुस्ताङमा पर्यटनको विकास गर्नका लागि गल्फ प्रतियोगिताको परिकल्पना गरिएको विष्टले बताए । ‘अब ट्रेकिङ रुटहरु मासिँदै गएका छन् । हामी पनि अन्यत्र सिफ्ट हुनुपर्ने छ,’ उनले भने, ‘सबैभन्दा उत्तम विकल्प गल्फ हो भन्ने लागेर सुरुआत गरिएको छ ।’ उनले कोर्सलाई गिनिज बुक अफ वल्र्ड रेकर्डमा दर्ज गराउन प्रयास भैरहेको सुनाए ।

‘जसरी आन्तरिक तथा बाह्य पर्यटक रोजाइ अहिले लुम्बिनी र सगरमाथा पर्छ त्यस्तै गरी मुस्ताङ गल्फ कोर्सले परिचय थप्छ भन्ने विश्वास हामीलाई छ,’ उनी अघि भन्छन्, ‘खेलकुदबाट पनि नेपालको प्रचार अन्तर्राष्ट्रियस्तरमा लैजान सकिन्छ । त्यसका लागि गिनिज बुकमा दर्ज गराउन लागिरहेका छौं ।’ ३६० डिग्रीमा हिमाल देखिने लोवथाङलाई सरकारले प्रवद्र्धन गर्न सके विश्वका गल्फरको सपनाको गन्तब्य बनाउन सकिने विष्टको तर्क छ ।

तेस्रो संस्करणको प्रतियोगितामा महिला र पुरुष विधाका विजेता, उपविजेता, बेस्ट ग्रस, क्लोजेस्ट टू द पिन र लंगेस्ट ड्राइभको पुरस्कार छ । यस्तै, प्रतियोगिताका ‘होल इन वान’ लाई याक पुरस्कार प्रदान गर्ने उनले बताए । याकको मूल्य १ लाख रुपैयाँ छ । तेस्रो होलमा यो पुरस्कार राखिएको छ । यो होल पार थ्री १५० यार्डमा छ । प्रोफेसनल गल्फ संघका सदस्य तथा प्राविधिक भूबहादुर गुरुङ (भुवन) ले सबै हिसाबले लोवथाङको गल्फ कोर्स अन्तर्राष्ट्रियस्तरको रहेको बताए । ‘केही टेक्निकल कुराहरु मिलाउन बाँकी छ । मुख्य समस्या ग्रीनको हो,’ उनले भने, ‘यसको लागि पनि टेक्नोलोजी छ । बनाउन सकिन्छ । तर राज्यले अपनत्व लिनुप¥यो ।’ गण्डकी प्रदेश सरकारले गौरवका रुपमा गल्फ कोर्सलाई राखे पनि लगानी भने गरेको छैन ।

गल्फ कोर्सलाई अन्तर्राष्ट्रिय मापदण्डको बनाउन आवश्यक प्रक्रिया सुरु भएको छ । पालिकाबाट जग्गा लिजमा लिन प्रक्रिया थालिएको कोर्सका सञ्चालकले जनाए । यसैका लागि मुस्ताङ गल्फ कोर्स दर्ता भएको छ । बर्खाको समयमा अन्य ठाउँमा गल्फ खेल्न सम्भव छैन । यो ५ महिना लोवथाङ सबैभन्दा उपयुक्त मौसम हो । त्यसैले मुस्ताङ गल्फ कोर्सको प्रवद्र्धन आवश्यक रहेको कास्की जिल्ला गल्फ संघ उपाध्यक्ष भक्तराज गुरुङले बताए ।