पोखरा । न्यू मोडल माध्यमिक विद्यालय, पोखरा–८, नागढुंगामा कक्षा ११ मा म्यानेज्मेन्ट तथा होटेल म्यानेजमेन्टमा भर्ना भएका नयाँ विद्यार्थीको सम्मानमा स्वागत कार्यक्रम गरिएको छ ।

विद्यालय प्राचार्य भेषराज शर्माको अध्यक्षतामा भएको कार्यक्रममा २०७९ सालको कक्षा १२ मा सो विद्यालयबाट म्यानेज्मेन्टमा जिल्ला प्रथम छात्रा तुलसी खत्रीले विशेष सम्बोधन गरेकी थिइन् । उनले सफल बन्न निरन्तर अभ्यास, सकारात्मक सोच साथ अनुशासन अपरिहार्य हुने बताइन् ।

विद्यालय निर्देशक भरतराज गौतमले देशका विभिन्न भूगोलबाट सुनौलो भविष्यको तयारीमा न्यू मोडल रोजेकोमा विद्यार्थीलाई धन्यवाद दिँदै उच्चतम् सफलताको शुभकामना दिए । सहनिर्देशक लक्ष्मण पोखरेल र सहप्राचार्य पदम बस्ताकोटीले विद्यालयले विद्यार्थीलाई पठनपाठनमा सबै सुविधा प्रदान गर्ने जनाउँदै विद्यार्थीको आगामी समय जीवनकै मार्गचित्र तय गर्ने समय भएकोले सदुपयोग गर्न सुझाव दिए ।

कक्षा १२ मा अध्ययनरत् छात्रछात्राले विभिन्न नृत्य, कविता तथा रोचक कार्यक्रम सञ्चालन गरेका थिए । कार्यक्रममा स्वागत कक्षा १२ की छात्रा विजयिता सिंहले गरेकी थिइन् भने सञ्चालन कक्षा १२ की छात्रा दिया थापाले गरेकी थिइन् । कक्षा ११ का छात्र निकेश भण्डारी र छात्रा छिरिङ डोलकरले कक्षा १२ तथा विद्यालयलाई धन्यवाद ज्ञापन गरे ।