पोखरा । काभा वुमन्स नेसन्स लिग २०२४ अन्तर्गत नेपालले शनिबार भारतमाथि सनसनीपूर्ण जित हात पारेको छ । २०४३ सालदेखि सुरु भएको नेपाली महिला भलिबलमा नेपालले पहिलोपल्ट भारतलाई हराएको हो । दशरथ रंगशालामा ३–२ को सेटमा जित हात पार्दा नेपाली खेलाडी र समर्थकले सेलिब्रेसन गरेका थिए ।

नेपालले २५–१८, १२–२५, २५–१७, १८–२५, १५–१३ ले पराजित गर्दा चौथो सेटसम्म बराबरी २–२ सेटका जित थियो । पाँचौं सेटमा नेपाल १४–१३ को अवस्थामा म्याच प्वाइन्ट उषा भण्डारीले जोडिन् र इतिहास लेखाइन् ।