पोखरा । पोखराको एसओएसका कुशल तिवारीले कक्षा १२ को नतिजामा सर्वोत्कृष्ट ३.९६ जिपिए ल्याउन सफल भएका छन् ।

पर्वतको कुष्मा १०, पिपलटारीका तिवारीले विज्ञान संकायबाट उत्कृष्ट जिपिए ल्याउन सफल भएका हुन् । यहाँ विज्ञान संकायमा मात्र पढाइ हुन्छ ।

विद्यालयबाट यस वर्ष १ सय ४० जना विद्यार्थीले कक्षा १२ को परीक्षा दिएकामा १ सय ३९ जना उत्तीर्ण भएको प्लस टु इन्चार्ज खगेन्द्र बरालले बताए । तीमध्ये ३.६१ देखि ४.० जिपिएभन्दा ल्याउने ६४ जना, ३.२१ देखि ३.६० जिपिएसम्म ६२ जना, २.८१ देखि ३.२० सम्म ११ जना छन् । १ जनाको २.७३ जिपिए आएको बरालले बताए ।

यहाँ नर्सरीदेखि १२ कक्षासम्म करिब १ हजार विद्यार्थी छन् ।

पोखराको मदरल्याण्डकी सदीक्षा क्षत्रीले पनि उनी समान ३.९६ जिपिए ल्याउन सफल भएकी छन् । कुशल र सदीक्षाको नतिजा नेपालमै सर्वोत्कृष्ट हुन सक्ने विद्यालयको दाबी छ ।