पोखरा, १८ साउन । मदरल्याण्ड मावि, पोखराले कक्षा १२ को नतिजामा यस वर्ष पनि नेपाल टप गर्न सफल भएको छ ।

शुक्रबार प्रकाशित नतिजामा विज्ञान संकायकी सदीक्षा क्षत्रीले ३.९६ जिपिए ल्याउन सफल भएकी छन् । यो नतिजा देशभरमै सर्वोत्कृष्ट अंक रहेको विद्यालयको दाबी छ । उनी पोखरा-१७ निवासी हुन् । अरु ३ जना विद्यार्थीको ३.९५ जिपिए आएको प्लस टु इन्चार्ज नारायण आचार्यले बताए । विज्ञान संकायका विनम श्रेष्ठ र प्रशील लामिछाने तथा व्यवस्थापन संकायबाट प्रशंसा बरालको ३.९५ जिपिए आएको हो । यस्तै, व्यवस्थापन संकायकै प्रसिम आचार्यले ३.९२ जिपिए ल्याए । पोखराकै अर्को स्कुल एसओएसका कुशल तिवारीको पनि समान ३.९६ जिपिए आएको छ । पर्वतको कुष्मा १० का तिवारीले विज्ञान संकायमा उत्कृष्ट जिपिए ल्याएका हुन्।

गत वर्ष मदरल्याण्डका ३ जना विद्यार्थी नेपालमै टपर भएका थिए । व्यवस्थापन संकायका राजेश पौडेल तथा विज्ञान संकायका जीवन अधिकारी र कृतिका थापाले ३.९६ जिपिए ल्याएपछि विद्यालयले जनही २ लाखसहित पुरस्कृतसमेत गरेको थियो ।

यसपालि देशभर कुल परीक्षार्थीमध्ये ५२ प्रतिशत पास हुँदा मदरल्याण्डले ९८ प्रतिशत विद्यार्थी उत्तीर्ण गराउन सफल भएको प्राचार्य नारायण बरालले बताए । उनका अनुसार कुल ३ सय ६१ विद्यार्थीले परीक्षा दिएका थिए । विज्ञान संकायका १ सय ९० मध्ये ९८.४२ प्रतिशत र व्यवस्थापनका १ सय ७१ मध्ये ९६.४९ प्रतिशत विद्यार्थी उत्तीर्ण भएका हुन् ।

८१ जनाले ३.६० जिपिएभन्दा माथि, १ सय ४६ जनाले ३.२० देखि ३.६० जिपिएसम्म, ९८ जनाले २.८० देखि ३.२० सम्म, २७ जनाले २.३८ देखि २.८० जिपिए ल्याएका छन्।

२०८० सालको हालै प्रकाशित एसइई नतिजामा समेत मदरल्याण्डकै १० जना विद्यार्थीको सर्वोत्कृष्ट ४.०० जिपिए तथा औषत ३.७९ जिपिए ल्याएपछि देशैभरि चर्चाको विषय बनेको थियो।