पोखरा । राष्ट्रिय परीक्षा बोर्डले शुक्रबार कक्षा १२ को नतिजा सार्वजनिक गरेको छ । बोर्डका सदस्यसचिव जंगबहादुर अर्यालका अनुसार गत वैशाख १४ देखि २४ गतेसम्म सञ्चालन भएको परीक्षामा ४ लाख ९१ हजार ४ सय ९७ विद्यार्थी सहभागी भएकामा ५२ प्रतिशतमात्र उत्तीर्ण भएको बताए ।

नतिजाअनुसार १ लाख ८७ हजार विद्यार्थी नन्ग्रेडेड भएका छन् । नियमिततर्फ ३ लाख ९० हजार ८ सय ६८ परीक्षार्थी सहभागी रहेकामा २ लाख ३ हजार ८ सय ४७ विद्यार्थी मात्रै उत्तीर्ण भएका हुन् । सबैभन्दा बढी २.८१ देखि ३.२० जिपिए प्राप्त गर्ने विद्यार्थीको संख्या ७८ हजार ७५ रहेको छ । २.४१ देखि २.८० जिपिए प्राप्त गर्ने विद्यार्थीको संख्या ६१ हजार ३६ छ । ३.२१ देखि ३.६० जिपिए प्राप्त गर्ने विद्यार्थीको संख्या ४६ हजार ८ सय ९३ रहेको छ । सबैभन्दा माथिल्लो ३.६१ देखि ४ जिपिए ल्याउने विद्यार्थी ९ हजार ५ सय ९१ छन् । २.१ देखि २.४० जिपिए ल्याउने विद्यार्थीको संख्या ८ हजार २ सय ४० र १.६१ देखि २ जिपिए ल्याउने विद्यार्थीको संख्या १२ जना छन् ।

बोर्डले ५ हजार ५ सय ४२ विद्यालयका विद्यार्थीलाई १ हजार ५ सय २६ परीक्षा केन्द्र मार्फत परीक्षा सञ्चालन गरेको थियो ।

राष्ट्रिय परीक्षा बोर्डले कक्षा–१२ को पूरक परीक्षा भदौ २५ र २६ गते सञ्चालन हुने जनाएको छ ।