नवलपरासी । पश्चिम नवलपरासीमा बिनादर्ता सञ्चालनमा रहेको म्यान पावर कम्पनी सिल गरिएको छ ।

जिल्ला प्रहरी कार्यालय पश्चिम नवलपरासीले श्रम तथा रोजगार कार्यालय रुपन्देहीको सहयोगमा रामग्राम ५, बाइपासमा सञ्चालनमा रहेको जेडी म्यानपावर सर्भिसेज सिल गरेको हो ।

प्रहरी नायव उपरीक्षक रमेश बोहोराका अनुसार जेडी मेनपावर सर्भिसेजका सञ्चालक भारतको महाराष्ट्र प्रदेशको मुम्बई जिल्ला बर्भे पोष्ट अस्लफा नगरगाउँ निवासी २४ वर्षीय निर्सग रवीन्द्र र मुम्बईको कोलाव बस्ने ३७ वर्षीय जावेद मसिहलाई पक्राउ गरेको छ ।

बिनादर्ता सञ्चालन गरेको पाइएपछि म्यानपावरको कार्यालय सिल गरी २ जना भारतीय नागरिकलाई पक्राउ गरेको बोहोराले बताए । अनुसन्धानको क्रममा निजहरुले करिब ५ दिन अगाडिदेखि उक्त कार्यालय सञ्चालन गरेको र रसिया, अस्ट्रेलिया, इटाली लगायतका देशमा लैजाने उद्देश्यले कार्यालय सञ्चालन गरेको पाइएको प्रहरीले अनुसन्धानको क्रममा पाएको जनाएको छ ।

प्रहरीले कार्यालयबाट २ थान मोबाइल, १ थान ल्यापटप, भारतीय आधारकार्ड, भारतीय बैंकको चेकबुक, डेबिड कार्ड बरामद गरेको छ । पक्राउ परेको २ जना र बरामद सामग्री आवश्यक कारबाहीका लागि श्रम तथा रोजगार कार्यालय रुपन्देही बुटवलमा बुझाइएको प्रहरीले जाएको छ ।